வீட்டுக்கொரு ஜல்லிக்கட்டு காளை - ஆச்சர்யமளிக்கும் புதுக்கோட்டை கிராம மக்கள்

புதுக்கோட்டை மாவட்டம் இலுப்பூர் அருகே ராப்புசல் கிராமத்தில் வசிக்கும் பெரும்பானமையான மக்கள் வீட்டில் ஜல்லிகட்டு காளைகள் வளர்ப்பதை வழக்கமாக கொண்டுள்ளனர்.

புதுக்கோட்டை:புதுக்கோட்டை மாவட்டம் பொதுவாகவே அதிக வாடிவாசல்களைக் கொண்ட மாவட்டம் என்பது அனைவருக்கும் தெரியும். தமிழர்களின் வீர விளையாட்டான ஜல்லிக்கட்டையும் தமிழர்களையும் பிரிக்க முடியாத ஒன்று. பெற்ற பிள்ளைகள் கூட இல்லாமல் வாழ்ந்து விடுவேன் ஆனால் ஜல்லிக்கட்டு போட்டிகள் இல்லாமல் என்னால் வாழ முடியாது என்று போட்டிக்கு ஆயத்தமாகி வரும் ஜல்லிக்கட்டு வீரர்கள் மற்றும் ஜல்லிக்கட்டு மாடுகள் குறித்த ஒரு தொகுப்பைக் காணலாம்.

புதுக்கோட்டை மாவட்டம் இலுப்பூர் அருகே உள்ள ஒரு கிராமம் தான் ராப்புசல் கிராமம், இந்த கிராமத்தில் 500க்கும் மேற்பட்ட குடும்பங்கள் உள்ளது. ஒவ்வொரு குடும்பத்திலும் குழந்தைகள் இருக்கிறதோ இல்லையோ ஜல்லிக்கட்டு காளைகள் ஒன்று இருப்பதைக் காணலாம். ஜல்லிக்கட்டு மாடுகள் வளர்ப்பதற்கு என்னென்ன உணவு முறைகள் தேவைப்படுகிறது என்பது குறித்து அந்த ஊரைச் சேர்ந்த சந்திரா கூறுகையில், ‘தவிடு புண்ணாக்கு மற்றும் கொண்டைக்கடலை உள்ளிட்ட சத்தான உணவுகளைக் காளைக்கு வழங்குவதாகவும் ஜல்லிக்கட்டு போட்டிக்கு முதல் நாள் மட்டுமே கடலை மிட்டாய் வாழைப்பழம் தேங்காய் உள்ளிட்ட பொருள்கள் கொடுத்து அழைத்துச் செல்வதாகவும் கூறினார்.

மேலும் தினமும் கட்டாயமாக நடைப் பயிற்சிக்கு அழைத்துச் செல்ல வேண்டும் எனவும் கூறினார். வாரத்திற்கு மூன்று முறை நீச்சல் பயிற்சி அளித்து வருவதாகவும் கூறுகிறார் ஜல்லிக்கட்டு போட்டிக்கு முதல் நாள் வீட்டிலேயே குளிப்பாட்டி விட்டு சாம்பிராணி காண்பித்து வீட்டில் விபூதி போட்டு அனுப்புவது அவர்கள் வழக்கம் என்றும் கூறினார்கள்

அதேபோல் அவர்களது வளர்ப்பு காளையானது ஜல்லிக்கட்டு போட்டிக்கு அழைத்துச் செல்லும் வாகனம் வந்தால் தானாகவே ஏறி ஜல்லிக்கட்டு போட்டிக்கு ஆயத்தமாகும் எனத் தெரிவித்தனர். பின்னர் அதே ஊரைச் சேர்ந்த ஜல்லிக்கட்டு காளை உரிமையாளர் இந்திரா பேசுகையில், ‘என் பிள்ளைகளைக் கூட நான் அந்த அளவுக்கு முக்கியம் கொடுத்து பார்த்துக்கொள்ள மாட்டேன் எனவும் எனது காளைக்கு மட்டுமே அதிக முக்கியத்துவம் தருவதாகவும் கூறினார்.

என்னுடைய காளையானது ஜல்லிக்கட்டுக்குச் செல்லும்போது.அன்றைய தினம் நான் வீட்டில் எந்த ஒரு வேலையும் செய்வதில்லை எனவும், அரை மணி நேரத்திற்கு ஒருமுறை போன் செய்து என்ன செய்கிறது என்பது குறித்தும் வாடிவாசலில் அவிழ்த்து விட்டதா என்பது குறித்தும் கேட்டு அறிவேன் என்று கூறினார்.

மாடு வாடிவாசலில் அவிழ்த்து விடப்பட்டது என்றும் அது வெற்றி அடைந்து விட்டது என்று கூறிய பின்னரே நான் நிம்மதி பெருமூச்சு விடுவேன். இது போன்ற நெகிழ்ச்சியான கிராம மக்களின் செயல் மூலம் தமிழர்களின் பாரம்பரியம் ஜல்லிக்கட்டையும் தமிழர்களையும் எப்போதும் பிரிக்க முடியாது என்பது தெரிய வருகிறது.