துணை ராணுவப்படையினர் கொடி அணிவகுப்பு!

புதுக்கோட்டை: வாக்காளர்கள் எந்தவித பயமும் இல்லாமல் வாக்களிப்பதற்கு ஏதுவாக சூழ்நிலை உள்ளதை உறுதிப்படுத்தும் விதமாக புதுக்கோட்டையில் 92 துணை ராணுவப்படையினர், 300க்கும் மேற்பட்ட காவலர்கள் கொடி அணிவகுப்பு நடத்தினர்.

புதுக்கோட்டை மாவட்டத்தில் உள்ள 6 சட்டப்பேரவை தொகுதிகளிலும் ஏப்ரல் 6ஆம் தேதி வாக்குப்பதிவு நடைபெறுகிறது. இதற்கான முன்னேற்பாடு பணிகளை தேர்தல் ஆணையமும், மாவட்ட நிர்வாகமும் மேற்கொண்டு வருகின்றன.

இந்நிலையில் தேர்தல் பாதுகாப்பாகவும் எந்தவிதமான அசம்பாவிதமும் நடைபெறாமல் இருப்பதற்கு பாதுகாப்பு பணியில் நாங்கள் ஈடுபட உள்ளோம், நீங்கள் பாதுகாப்பாக வாக்களிப்பதற்கு நாங்கள் உறுதுணையாக இருக்கிறோம் என்பதை வெளிப்படுத்தும் விதமாக புதுக்கோட்டை மாவட்டத்திற்கு நேற்று முன்தினம் வந்த 92 துணை ராணுவப் படையினர் மற்றும் 300க்கும் மேற்பட்ட சட்டம்-ஒழுங்கு காவல் அதிரடி படை வீரர்கள் பேரணியாக கொடி அணிவகுப்பை நடத்தினர்.

இந்தக் கொடி அணிவகுப்பு மாவட்ட பொதுவளாகத்திலிருந்து நகரின் முக்கிய வீதிகள் வழியாக புதுக்கோட்டை புதிய பேருந்து நிலையத்தை வந்தடைந்தது. பேரணியை மாவட்ட தேர்தல் நடத்தும் அலுவலரும் ஆட்சியருமான உமாமகேஸ்வரி மாவட்ட காவல் கண்காணிப்பாளர் பாலாஜி சரவணன் ஆகியோர் தொடங்கிவைத்தனர்.

கொடி அணிவகுப்பில் வஜ்ரா வாகனங்கள், பேண்டு வாத்தியங்கள் இசை முழங்க நடைபெற்றது. கொடி அணிவகுப்பில் பங்கேற்ற துணை ராணுவத்தினர் கையில் துப்பாக்கிகளுடன் கலந்துகொண்டனர்.

இதையும் படிங்க:கழிவுநீர் கலந்து வரும் குடிநீர் - குடங்களுடன் பொதுமக்கள் சாலை மறியல்