வைட்டமின் 'ஏ' திரவம் வழங்கும் சிறப்பு முகாம்: பெரம்பலூர் ஆட்சியர் தொடங்கிவைப்பு!

பெரம்பலூர்: குழந்தைகளுக்கு வைட்டமின் 'ஏ' திரவம் வழங்கும் சிறப்பு முகாமை நேற்று (ஆக. 25) பெரம்பலூர் மாவட்ட ஆட்சியர் சாந்தா தொடங்கிவைத்தார்.

பெரம்பலூர் மாவட்டம் ஈச்சம்பட்டி கிராமத்தில் நடைபெற்றுவரும் வைட்டமின் 'ஏ' திரவம் வழங்கும் சிறப்பு முகாமில் மாவட்ட ஆட்சியர் வே. சாந்தா குழந்தைகளுக்கு வைட்டமின் ஏ திரவத்தினை வழங்கி தொடங்கிவைத்தார். பின்னர், இது குறித்து அவர் கூறுகையில்,

"பெரம்பலூர் மாவட்டத்தில் முதற்கட்டமாக நடைபெற்றுவரும் இந்தச் சிறப்பு முகாம் காலை 8 மணி முதல் மாலை 5 மணி வரை நடைபெறுகிறது. இதில், 6 மாதம் முதல் 5 வயது வரையிலான அனைத்து ஆண், பெண் குழந்தைகளுக்கு கண்பார்வைத் திறன், நிமோ நியா காய்ச்சல், வயிற்றுப்போக்கு போன்ற நோய்த்தாக்கத்திலிருந்து எதிர்ப்பு சக்தியை அதிகரிக்க ஊட்டச்சத்துமிக்க வைட்டமின் ஏ திரவம் வழங்கப்பட்டுவருகிறது.

பெரம்பலூர் மாவட்டத்தில் கிராமப்புறங்களில் 38 ஆயிரத்து 339 குழந்தைகளுக்கும், நகர்ப்புறங்களில் ஐந்தாயிரத்து 130 குழந்தைகள் என மொத்தம் 43 ஆயிரத்து 469 குழந்தைகளுக்கு வைட்டமின் ஏ திரவம் வழங்கப்பட திட்டமிடப்பட்டுள்ளது.

அனைத்து கிராமப்புறங்கள், நகர்ப்புறங்கள், பேருராட்சி, நகராட்சிப் பகுதிகளில் ஏற்கனவே தடுப்பூசி பணிகள் மேற்கொள்ளப்படும் மையங்களில் வைத்து வைட்டமின் ஏ திரவம் வழங்கப்படவுள்ளது.

எனவே 6 மாதம் முதல் 5 வயது வரையிலான அனைத்து குழந்தைகளையும் அவர்களது பெற்றோர் அருகிலுள்ள வைட்டமின் 'ஏ' திரவம் வழங்கும் மையத்திற்கு அழைத்துச் செல்ல வேண்டும்" எனத் தெரிவித்தார்.