விஜிலென்ஸ் ரெய்டு; சார் பதிவாளர் அலுவலகத்தில் ரூ.40 ஆயிரம் பறிமுதல்!

நாமக்கல்: சார்பதிவாளர் அலுவலகத்தில் லஞ்ச ஒழிப்புத் துறையினர் நடத்திய திடீர் சோதனையில் கணக்கில் வராத ரூ.40 ஆயிரம் பணம் பறிமுதல் செய்யப்பட்டது.

நாமக்கல் மாவட்டம், இணை சார் பதிவாளர் அலுவலகத்தில் அதிகளவு லஞ்சம் வாங்குவதாக நாமக்கல் லஞ்ச ஒழிப்பு காவல்துறையினருக்கு புகார் வந்தது. இதனையடுத்து நாமக்கல் லஞ்ச ஒழிப்புத் துறை துணை காவல் கண்காணிப்பாளர் ஜெய்குமார் தலைமையில் காவலர்கள், சார் பதிவாளர் அலுவலகத்தில் இன்று திடீர் சோதனை மேற்கொண்டனர்.

அப்போது அலுவலகத்தில் இருந்த சார் பதிவாளர் சுந்தரவடிவேல் அறை, அலுவலகம் முழுவதையும் சோதனை செய்தனர். அப்போது கணக்கில் வராத ரொக்கப் பணம் ரூ.40 ஆயிரம் மற்றும் முக்கிய ஆவணங்கள் சிக்கின. இது குறித்து அலுவலக பணியாளர்கள், இடைத்தரகர்கள் மற்றும் பொதுமக்களிடமும் லஞ்ச ஒழிப்புத் துறையினர் விசாரணை மேற்கொண்டனர்.

இணை சார் பதிவாளர் அலுவலகத்தில் லஞ்ச ஒழிப்புத்துறையினர் நடத்திய திடீர் சோதனையால், அலுவலகத்தில் பெரும் பரபரப்பு ஏற்பட்டது.