தமிழகம் முழுவதும் லாரிகள் இன்று இயங்காது… வரி உயர்வை கண்டித்து லாரி உரிமையாளர்கள் வேலை நிறுத்தம்!

Lorry strike in TamilNadu: வாகனங்களுக்கான காலாண்டு வரி உயர்வு ரத்து உள்ளிட்ட 3 அம்ச கோரிக்கைளை வலியுறுத்தி இன்று தமிழகம் முழுவதும் லாரி உரிமையாளர்கள் ஒரு நாள் அடையாள வேலை நிறுத்தத்தில் ஈடுபட்டுள்ளனர்.

நாமக்கல்: ஆன்லைன் அபராதம், வாகன உதிரிபாகங்கள் விலை உயர்வு போன்ற காரணங்களால் லாரி தொழில் நலிவடைந்து வரும் நிலையில் தற்போது காலாண்டு வரியை 40 சதவீதம் வரை உயர்த்தி தமிழக அரசு அண்மையில் அரசாணை வெளியிட்டுள்ளது. இதனை எதிர்த்து லாரி உரிமையாளர்கள் சங்கத்தினர் பல்வேறு போராட்டங்களில் ஈடுபட்டு வந்தனர்.

இந்நிலையில் தமிழ்நாடு மாநில லாரி உரிமையாளர்கள் சம்மேளனம் சார்பில் இன்று (09.11.23) ஒருநாள் அடையாள வேலைநிறுத்தத்தில் ஈடுபட உள்ளதாக சம்மேளனத்தின் தலைவர் தன்ராஜ் அறிவித்தார். இந்த போராட்டத்தின் 3 அம்ச கோரிக்கையாகக் காலாண்டு வரி உயர்வை ரத்து செய்தல், ஆன்லைன் வழக்கு விதிப்பதை ரத்த செய்ய வேண்டும் மற்றும் அரசு மணல் குவாரிகளை உடனடியாக திறக்க வேண்டும் என லாரி உரிமையாளர் சங்கத்தினர் தமிழக அரசை வலியுறுத்தியுள்ளனர்.

இன்று நடைபெறும் போராட்டத்திற்குத் தென் மாநில லாரி உரிமையாளர்கள் சம்மேளனம், அகில இந்திய மோட்டார் காங்கிரஸ், தென் மண்டல எல்பிஜி டேங்கர் லாரி உரிமையாளர்கள் சம்மேளனம், மணல் லாரி உரிமையாளர்கள், வாடகை வாகனங்கள் உரிமையாளர்கள் சங்கம், லாரி பாடி பில்டிங் உரிமையாளர்கள் சங்கத்தினர் ஆதரவு அளித்துள்ளனர்.

அதன்படி இன்று காலை 6 மணி முதல் மாலை 6 மணி வரை நடைபெற உள்ள இந்த வேலை நிறுத்தப் போராட்டத்தில் தமிழ்நாடு முழுவதும் உள்ள சுமார் 6 லட்சத்துக்கும் மேற்பட்ட சரக்கு மற்றும் எல்பிஜி டேங்கர் லாரிகள், 55 ஆயிரம் மணல் லாரிகள், 23 லட்சம் இலகு ரக வாகனங்கள் ஆகியவை இயக்கப்படாமல் ஆங்காங்கே நிறுத்தப்பட்டுள்ளது.

அதேபோல் வெளி மாநிலங்களில் இருந்து தமிழகத்திற்கு இயக்கப்படும் லாரிகள் தமிழக எல்லைப் பகுதியில் நிறுத்தி வைக்கப்பட்டுள்ளது எனக் கூறப்படுகிறது. லாரி உரிமையாளர்களின் ஒரு நாள் வேலைநிறுத்த போராட்டத்தால் சுமார் 300 கோடி ரூபாய்க்கு வாடகை இழப்பு ஏற்படுவதோடு 5,000 கோடி மதிப்புள்ள சரக்குகள் பரிமாற்றத்திலும் முடக்கம் ஏற்படும் நிலை ஏற்பட்டுள்ளது.

இந்நிலையில் தமிழக அரசு உடனடியாக லாரி உரிமையாளர்களை அழைத்து பேச்சுவார்த்தை நடத்தித் தங்களது கோரிக்கைகளை நிறைவேற்ற வேண்டும் என்பதே லாரி உரிமையாளர்களின் கோரிக்கையாக உள்ளது.

இதையும் படிங்க:வெளிநாடுகளுக்கு கடத்த முயன்ற யானை தந்தங்கள்.. விருதுநகரில் மர்ம கும்பலை மடக்கி பிடித்த அதிகாரிகள்!