நாமக்கல் மாவட்டம் திருச்செங்கோடு அடுத்த எளையாம்பாளையத்தில் உள்ள தனியார் கல்லூரி வளாகத்தில், பள்ளிக் கல்வித் துறை சார்பில், நாமக்கல்-சேலம்-கரூர் ஆகிய 3 மாவட்டங்களைச் சேர்ந்த 316 தனியார் பள்ளிகளுக்குத் தொடர் அங்கீகார ஆணை வழங்கும் விழா இன்று (அக். 29) நடைபெற்றது. இவ்விழாவில் கலந்துகொண்ட மாநில பள்ளிக் கல்வித் துறை அமைச்சர் கே.ஏ. செங்கோட்டையன், மின் துறை அமைச்சர் பி. தங்கமணி ஆகியோர் நாமக்கல்-சேலம்-கரூர் ஆகிய 3 மாவட்டங்களைச் சேர்ந்த 316 தனியார் பள்ளிகளுக்குத் தொடர் அங்கீகார ஆணைகளை அந்தந்த பள்ளி நிர்வாகிகளிடம் அளித்தனர்.
பின்னர் செய்தியாளர்களிடம் பேசிய பள்ளிக் கல்வித்துறை அமைச்சர் கே.ஏ. செங்கோட்டையன், “நீட் தேர்வை பொறுத்தவரை மாநில அரசு வடிவமைத்த பாடத்திட்டத்தின்கீழ் 174 கேள்விகள் கேட்கப்பட்டுள்ளன. மாணவர்கள் எந்தத் தேர்வையும் எதிர்கொள்ளும் வகையில் மாநில அரசு பாடத்திட்டம் வடிவமைக்பட்டுள்ளது. ஆசிரியர் பணி நியமனத்தில் 40 வயதாக குறைத்தது குறித்து பொதுமக்களும் ஆசிரியர் சங்க நிர்வாகிகளும் இந்த வயது வரம்பை நீட்டிக்க வேண்டும் என்ற கோரிக்கை முதலமைச்சரின் கவனத்திற்கு கொண்டு செல்லப்படும்.