டயர் உற்பத்தியைப் பெருக்கி விலையை குறைக்க வேண்டும்- லாரி உரிமையாளர்கள் கோரிக்கை!

நாமக்கல்: வெளிநாடுகளில் இருந்து டயர் இறக்குமதியை தடை செய்ய முடிவு செய்த மத்திய அரசு, உள்நாட்டில் டயர் தொழில் வளர்ச்சியைப் பெருக்கி, அதன் விலையைக் குறைக்க நடவடிக்கை எடுக்க வேண்டும் என லாரி உரிமையாளர்கள் கோரிக்கை விடுத்துள்ளனர்.

கடந்த சில மாதங்களாக, இந்தியாவில் பொருளாதார மந்தநிலை நிலவி வருகிறது. இதனை சரிசெய்ய மத்திய அரசு பல்வேறு நடவடிக்கைகளை மேற்கொண்டு வருகிறது. அதன் ஒருபகுதியாக, சிறு, குறு நிறுவனங்களை ஊக்குவிக்க ‘மேக் இன் இந்தியா’ திட்டத்தை முழுமையாக செயல்படுத்த பல்வேறு நடவடிக்கைகள் எடுக்கப்பட்டு வருகின்றன.

டயர்ரீடிரேடிங் பணியில் ஈடுபட்டிருக்கும் தொழிலாளர்கள்.

அதாவது, வெளிநாடுகளில் இருந்து இறக்குமதி செய்யப்படும் பொருள்களுக்கு தடை செய்து, அந்த பொருள்களை இந்தியாவில் தயாரித்து விற்பனை செய்வதாகும். இந்தியாவில் பயன்படுத்தப்படும் டயர்களில் 20 முதல் 30 சதவீதம் டயர்கள் தாய்லாந்து, சீனாவிலிருந்து இறக்குமதி செய்யப்படுகிறது. இதன் மூலம் அதிகளவு அந்நியச் செலாவணி வெளிநாடுகளுக்கு செல்கிறது.

புதியதாகத் தயாரிக்கப்பட்ட டயர்கள்.

இதனை குறைக்கும் நோக்கிலும், உள்நாட்டு உற்பத்தியை ஊக்குவிக்கும் விதமாக டயர் இறக்குமதிகளுக்கு அதிகளவு வரி விதிக்க மத்திய அரசு முடிவு செய்துள்ளதாக தகவல்கள் வெளியாகி உள்ளது. மத்திய அரசின் இந்த முடிவு டயர் தொழிலில் பெரும் மாற்றத்தை ஏற்படுத்தும் என்றும், அதே சமயம் விலை உயர்வையும் அரசு கட்டுபடுத்த வேண்டும் எனவும் வாகன உரிமையாளர்கள் கோரிக்கை விடுத்துள்ளனர்.

இது குறித்து டயர் விற்பனையாளர் பரமன் கூறுகையில், “வெளிநாடுகளில் இருந்து டயர் இறக்குமதிக்கு தடை விதிக்கும் முடிவு வரவேற்புக்குரியது. இதன் மூலம் உள்நாட்டில் டயர் உற்பத்தி அதிகரித்து பலருக்கும் வேலை வாய்ப்பு கிடைப்பதோடு, உள்நாட்டிலே சர்வதேச தரத்திலான டயர்களை அதிகளவு உற்பத்தி செய்ய முடியும்” என்றார்.

இது குறித்து டயர் ரீடிரேடிங் செய்து வரும் ரவிச்சந்திரன் கூறுகையில், “வெளிநாட்டில் இருந்து இறக்குமதி செய்யப்படும் டயர்கள் விலை மலிவாக இருந்தாலும், அதன் தரம் குறைந்தே காணப்படுகிறது. விலை குறைவை நம்பி வெளிநாட்டு டயர்களை வாங்கிய பலருக்கு இழப்பே அதிகளவு ஏற்பட்டுள்ளது.

உள்நாட்டில் தற்போது பல நிறுவனங்கள் ரேடியல் டயர்களை அதிகளவு உற்பத்தி செய்து வரும் நிலையில், டயர் உற்பத்தியைப் பெருக்க அடிப்படை கட்டமைப்பு வசதிகளை மத்திய அரசு மேம்படுத்தி தர வேண்டும்” என்றார்.

இது குறித்து லாரி உரிமையாளர் பாலசுப்பிரமணி கூறயதாவது, “உள்நாட்டில் உற்பத்தியைப் பெருக்காமல் திடீரென வெளிநாட்டில் இருந்து டயர் இறக்குமதியைத் தடை செய்ய மத்திய அரசு முடிவெடுத்திருப்பது லாரி தொழிலை கடுமையாகப் பாதிக்கும். இதனால் டயர் விலை கடுமையாக உயர வாய்ப்புள்ளது.

எனவே இவற்றை மத்திய அரசு கருத்தில் கொண்டு வாகன தொழிலை பாதிக்காத வகையில் செயல்படுத்த வேண்டும்” எனத் தெரிவித்தார்.

‘மேக் இன் இந்தியா’ திட்டத்தை வரவேற்கும் வாகன உரிமையாளர்கள், தங்களின் தொழில் பாதிக்காத வகையில் இறக்குமதிக்குத் தடை விதிக்கும் மத்திய அரசின் முடிவை செயல்படுத்த வேண்டும் என்பதே அனைவரின் எதிர்பார்ப்பாகவும் உள்ளது.

இதையும் படிங்க: டயர் குடோனில் தீ விபத்து - பல லட்சம் மதிப்பிலான பொருட்கள் சேதம்