இந்து மக்கள் கட்சி பொதுச் செயலாளர் மீது தாக்குதல்!!

நாகை: இந்து மக்கள் கட்சியின் நாகை மாவட்ட பொதுச் செயலாளர் பார்த்திபன் மீது அடையாளம் தெரியாத நபர்கள் தாக்குதல் நடத்தியுள்ளனர்.

நாகையை அடுத்த பொரவச்சேரி பகுதியைச் சேர்ந்தவர் பார்த்திபன். இவர் இந்து மக்கள் கட்சியின் மாவட்ட பொதுச் செயலாளராக பதவி வகித்து வருகிறார்.

இந்நிலையில், சொந்த வேலை காரணமாக சிக்கல் பகுதியில் இருந்து தனது வீட்டுக்கு இரு சக்கர வாகனத்தில் சென்று கொண்டிருந்த அவரை, வழிமறித்த அடையாளம் தெரியாத நபர்கள், இரும்புக் கம்பி உள்ளிட்ட ஆயுதங்களால் கடுமையாக தாக்கிவிட்டு அங்கிருந்து தப்பிச் சென்றனர் .

தாக்குதலில் காயமடைந்த பார்த்திபனை அருகிலிருந்தவர்கள் மீட்டு, நாகை தலைமை அரசு மருத்துவமனையில் சிகிச்சைக்காக சேர்த்தனர்.

தாக்குதல் நடத்தியவர்கள் இரும்புக் கம்பி உள்ளிட்ட ஆயுதங்களைக் கொண்டு தன்னை அடித்ததாக கூறியவர், சம்பந்தப்பட்டவர்கள் மீது உரிய நடவடிக்கை எடுக்க வேண்டும் என்று காவல்துறைக்கு வேண்டுகோள் விடுத்தார்.