இந்தியாவிலேயே தொன்மையான மயிலாடுதுறை தருமபுரம் ஆதீன திருமடத்தில், 27ஆவது குருமகாசந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகளை பால்வளத்துறை அமைச்சர் ராஜேந்திர பாலாஜி நேரில் சந்தித்து ஆசி பெற்றார். அவருக்கு தருமபுரம் ஆதீன கோயிலான திருக்கடையூர் அமிர்தகடேஸ்வரர் கோயில் பிரசாதத்தை வழங்கி தருமபுரம் ஆதீன குருமகா சந்நிதானம் அருளாசி வழங்கினார். இந்த சந்திப்பு அரைமணி நேரத்துக்கும் மேலாக நீடித்தது.
ஆதீனத்தை சந்தித்து அருள் ஆசி பெற்ற பின் செய்தியாளர்களிடம் பேசிய அமைச்சர் ராஜேந்திர பாலாஜி,”இந்தச் சந்திப்பு மனநிறைவைத் தருகிறது. பல ஆண்டுகளாக கும்பாபிஷேகம் நடத்தப்படாத கோயில்களுக்கு கும்பாபிஷேகம் நடத்த தமிழ்நாடு முதலமைச்சரிடம் வலியுறுத்தவுள்ளேன். கோயில் புனரமைப்பு குறித்து சுவாமிகளுடன் உரையாடினேன்”என்றார்.