மனுஷன் இந்த அரிசியை திம்பானா...? ரேசன் அரிசியை சாலையில் கொட்டிய முதியவர்..!

நாகப்பட்டினம்: ரேசன் அரிசியை சாலையில் முதியவர் ஒருவர் கொட்டும் வீடியோ சமூக வலைதளங்களில் வைரலாகியுள்ளது.

நாகை மாவட்டம் குத்தாலம் தாலுகா பெருமாள் கோயில் தெற்கு வீதியில் உள்ள ரேசன் கடையில் 65 வயது மதிக்கதக்க முதியவர் ஒருவர் 20 கிலோ இலவச ரேசன் அரிசியை வாங்கியுள்ளார். அந்த அரிசி குண்டரிசியாக இருப்பதாக கூறி சாலை ஓரத்தில் நடந்தபடியே கொட்டியுள்ளார். இதைக் கண்ட ஒரு பெண் ஏன் அரிசியை கீழே கொட்டுறீங்க என்று கேட்டதற்கு, அரிசிங்கிர பேருல குண்டரிசி கொடுக்குறான், அத சாப்பிடமுடியுமா சோறுவடிச்சி, மனிஷன் சாப்பிட முடியாது, ஆடுமாடாவது திங்கட்டுன்னுதான் ரோட்டுல கொட்டினேன்.

முதியவரின் இந்த செயலை பார்த்த நபர் ஒருவர் அதை வீடியோவாக எடுத்துள்ளார். இதையறிந்த அந்த முதியவர் வீடியோ எடுத்துவிட்டியாடா, வாட்ஸ்ஆப்பில் அனுப்பு என்று கூறிவிட்டு சென்றார். இந்த வீடியோ தற்போது சமூக வலைதளத்தில் வைரலாகி வருகிறது.

இது குறித்து தகவலறிந்த குத்தாலம் வட்ட வழங்கல் அலுவலர் தையல்நாயகி, குறிப்பிட்ட ரேஷன்கடை ஊழியரிடம் விசாரணை நடத்தினார். பின்பு இது குறித்து ரேசன் கடை ஊழியர் அறிவழகன் அளித்த புகாரின் பேரில் காவல் துறையினர் வழக்குப்பதிவு செய்து விசாரணை மேற்கொண்டனர். அதில் அதேப்பகுதியைச் சேர்ந்த ரமணி என்பதும், சமையல் தொழில் செய்து வருவதும் காவல்துறையினர் விசாரணையில் தெரியவந்துள்ளது. இந்நிலையில் அவரை காவல் துறையினர் தேடிவருகின்றனர்.

இதையும் படிங்க: கர்நாடகாவிற்கு லாரியில் கடத்தப்பட்ட 17 டன் ரேஷன் அரிசி பறிமுதல்!