'பாண்டி ஜுஸ்' என்ற பெயரில் சாராயம் கடத்தல் - வாகன சோதனையில் வசமாக சிக்கிய அமமுக பிரமுகர்!

நாகை: ஆயிரம் சாராய பாக்கெட்டுகளை காரில் கடத்தி வந்த அமமுக இளைஞரணிச் செயலாளரை மதுவிலக்கு அமல் பிரிவு காவலர்கள் கைது செய்து காரை பறிமுதல் செய்தனர்.

நாகை மாவட்டம் கங்களாஞ்சேரி பகுதியில் மதுவிலக்கு அமல் பிரிவு காவலர்கள் இன்று (ஜன. 24) வாகன சோதனையில் ஈடுபட்டிருந்தனர். அப்போது அவ்வழியே வேகமாக வந்த காரை மறித்து சோதனை செய்தபோது, சாராய பாக்கெட்டுகள் கடத்தி வரப்பட்டது தெரியவந்தது.

பாண்டி ஜுஸ் என்று அச்சிடப்பட்டிருந்த சுமார் 50 ஆயிரம் ரூபாய் மதிப்பிலான 1,000 சாராய பாக்கெட்டுகள் மற்றும் காரை பறிமுதல் செய்த காவலர்கள், கடத்தலில் ஈடுபட்ட காரைக்கால் மாவட்டம் நல்லம்பல் பகுதியைச் சேர்ந்த சர்புதினை கைது செய்தனர்.

விசாரணையில் சர்புதீன் அம்மா மக்கள் முன்னேற்ற கழகத்தின் காரைக்கால் மாவட்ட இளைஞரணிச் செயலாளர் என்பதும், கோட்டுச்சேரியிலிருந்து திருவாரூருக்கு விற்பனைக்காக சாராய பாக்கெட்டுகளை கடத்திச் சென்றதும் தெரியவந்துள்ளது.

இதையும் படிங்க... சிசிடிவி: போலீசை பார்த்து தெறித்து ஓடிய திருடர்கள்... ரத்தம் சொட்டிய நிலையிலும் துரத்திப் பிடித்த காவலர்!