மதுரை: சிவகங்கை நகர் பகுதியைச் சேர்ந்த நான்காம் ஆண்டு சட்ட கல்லூரி மாணவி தற்போது வழக்கறிஞராக பணியாற்றி வருகிறார். இவர், தான் பாஜகவைச் சேர்ந்த இளைஞர் ஒருவரால் பாதிக்கப்பட்டுள்ளதாக சிவகங்கை காவல் நிலையத்தில் புகார் அளித்துள்ளார்.
அந்த புகாரில் அவர் கூறியிருப்பதாவது, "என் தந்தை கூலி வேலை செய்துவரும் நிலையில், நான் நான்காம் ஆண்டு சட்டம் பயின்று வருகிறேன். எனக்கு ஒரு தம்பியும், ஒரு தங்கையும் உள்ள நிலையில் உதவி வழக்கறிஞராகவும் பணி செய்கிறேன்.
குளிர்பானத்தில் மயக்க மருந்து
என்னுடைய வேலை நிமித்தமாக சிவகங்கை காமராஜர் காலனியில் உள்ள பாரத் லால் என்பவரது போட்டோ ஸ்டுடியோவிற்கு சென்றேன். அப்போது பாரத் லாலுக்கும் எனக்கும் பழக்கம் ஏற்பட்டது.
இந்நிலையில் ஒருநாள் அவர் கொடுத்த குளிர்பானத்தை குடித்தபோது தலை சுற்றல் ஏற்பட்டது. சிறிது நேரத்தில் மயக்க நிலை அடைந்தேன். அப்போது என்னை பாலியல் வன்புணர்வு செய்து அதனை புகைப்படம் பிடித்து வைத்துள்ளார்.