‘எத்தனையோ தேர்தல்களை நாங்கள் பார்த்துள்ளோம்; முடிவை மக்கள் எடுப்பார்கள்’ - செல்லூர் ராஜூ

மதுரை: எத்தனையோ தேர்தல்களை நாங்கள் பார்த்துள்ளோம், கன்னியாகுமரி முதல் திருத்தணி வரை ஒரே முடிவை தான் மக்கள் எடுப்பார்கள் என, கூட்டுறவுத்துறை அமைச்சர் செல்லூர் ராஜூதெரிவித்துள்ளார்.

மொழிப்போர் தியாகிகளுக்கு மரியாதை செலுத்தும் வகையில், அதிமுக சார்பில் கூட்டுறவுத்துறை அமைச்சர் செல்லூர் ராஜூ தமுக்கம் மைதானத்தில் உள்ள தமிழன்னை சிலைக்கு மாலை அணிவித்து நேற்று(ஜன.25) மரியாதை செலுத்தினார். மொழிப்போர் தியாகிகளுக்கு மரியாதை செலுத்தும் வண்ணம் வீர வணக்க உறுதிமொழி எடுத்துக்கொண்டனர்.

அதன்பின் செய்தியாளர்களைச் சந்தித்த செல்லூர் ராஜூ, “மாணவர்கள் நினைத்தால் நடத்திக்காட்டுவார்கள். காங்கிரஸ் ஆட்சியை ஒழிக்க வேண்டும் என மாணவர்கள் நினைத்ததால்தான் 1967 முதல் தமிழ்நாட்டில் காங்கிரசை ஆட்சிக்கு வரவிடாமல் ஒழித்து திராவிட இயக்கங்கள் ஆட்சியில் உள்ளன.

தமிழ்மொழியைக் காக்க தமிழுக்காகப் பல தியாகங்களை செய்த பலருக்கு உதவியது அதிமுக அரசு தான். தமிழ் மொழிக்காக மாநாடு நடத்தியவர்கள் எம்ஜிஆர், ஜெயலலிதா. இருவரும் தமிழுக்குப் பல்கலைக்கழகம் அமைத்தவர்கள். எங்கள் கூட்டணி பேச்சுவார்த்தைக்கு முதலமைச்சர், துணைமுதல்வர் தலைமையில் குழு அமைக்கப்பட்டு முடிவு எடுக்கப்படும்.

தேமுதிக பொருளாளர் பிரேமலதா விஜயகாந்த் கூறியதை அதிமுக நிர்வாகிகள் குழு எடுத்துச் சொல்லும். அதிமுக தான் பாஜகவைத் தேடி வந்ததாக சிடி ரவி பேசியது குறித்த கேள்விக்கு, பாஜக பொறுப்பாளர் சி டி.ரவி பேசியதற்குத் தலைவர்கள் பதில் சொல்வார்கள். கூட்டணி பற்றிய கருத்துக்களை பேச குழு அமைக்கப்பட்டுள்ளது.

உதயநிதி ஸ்டாலினுக்கு என்ன தெரியும். நேற்று பெய்த மழையில் முளைத்தவர் அவர். உதயநிதிக்கு என்ன அரசியல் பின்புலம் உள்ளது. அவருக்கு அரசை பற்றி என்ன தெரியும். உதயநிதி எதைப்பேசினலும் தெளிவாக பேச சொல்லுங்கள். எடுத்தோம் கவிழ்த்தோம் என பேச வேண்டாம். திமுகவின் அடுத்தக்கட்ட தலைவராக உள்ள உதயநிதி, புரிந்துகொண்டு பேச வேண்டும்.

குடும்ப ஆட்சி அரசியல் நடத்தும் திமுகவை மக்கள் வீட்டுக்கு அனுப்ப தயாராக உள்ளனர். கரோனா காலத்தில் முதலமைச்சர் ஊர் ஊராக சென்று கரோனாவை கட்டுப்படுத்தினார். உலகத்திற்கே முன்மாதிரியான நடவடிக்கை எடுத்தார். தற்போது மக்கள் செழிப்பாக உள்ளனர். எப்போது தேர்தல் வரும் என மக்கள் காத்துக் கொண்டுள்ளனர். அதிமுகவிற்கு வாக்களிக்கத் தயாராக உள்ளனர்.

அலங்காநல்லூர் முறைகேடு குறித்து விசாரிக்கக் குழு அமைக்கப்பட்டுள்ளது. நாங்கள் மக்களுக்கான திட்டங்களை நிறைவேற்றி உள்ளோம். மக்கள் தான் எஜமானார்கள்,மக்கள் வாக்களித்தால் எங்கள் ஆட்சி அமையும். எத்தனையோ தேர்தல்களை நாங்கள் பார்த்துள்ளோம். கன்னியாகுமரி முதல் திருத்தணி வரை ஒரே முடிவை தான் மக்கள் எடுப்பார்கள் ,மக்களின் பல்ஸ் பற்றி எங்களுக்கு நன்றாக தெரியும்”

இவ்வாறு செல்லூர் ராஜூ கூறினார்.

இதையும் படிங்க: பத்ம விருதுகளில் ஜொலிக்கும் தமிழர்கள்