கட்டிடம் இடிந்து விழுந்த சம்பவத்தில் மூவர் பலி - நால்வர் படுகாயத்துடன் மீட்பு

மதுரை: கட்டடம் சரிந்து விழுந்த விபத்தில் மூவர் பலியாகியுள்ளனர். நான்கு பேர் மருத்துவமனையில் சிகிச்சை பெற்று வருகின்றனர். கட்டிட உரிமையாளர் கைது செய்யப்பட்டு விசாரணை நடைபெற்று வருகிறது.

மதுரையில், கட்டப்பட்டுவரும் கட்டடம் ஒன்று நேற்று சரிந்து விழுந்தது. இச்சம்பவத்தில் கட்டிடத்தில் வேலை பார்த்து கொண்டிருந்த 7 தொழிலாளர்கள் சிக்கிக் கொண்டனர். இந்நிலையில், இடிபாடுகளில் சிக்கி 3 பேர் பலியாயினர். நான்கு பேர் படுகாயத்துடன் மீட்கப்பட்டு மதுரை அரசு ராசாசி மருத்துவமனையில் சிகிச்சை பெற்று வருகின்றனர். இதனை தொடர்ந்து, கட்டிட உரிமையளார் மாதவனை செக்கானூரனி காவல்துறையினர் கைது செய்தனர். இந்நிலையில், மீட்புப் பணிகளைப் பார்வையிடுவதற்காக மதுரை மாவட்ட ஆட்சியர் ராஜசேகர், மாவட்ட காவல்துறை கண்காணிப்பாளர் மணிவண்ணன் ஆகியோர் சம்பவ இடத்திற்கு சென்று ஆய்வு செய்தனர்.

இதுகுறித்து ஆட்சியர் ராஜசேகர் கூறுகையில், "ஒப்பந்ததாரர் மாதவன் பெயரில் இதுவரை அனுமதி பெற்றதற்கான எந்த சான்று இல்லை. வேறு யாராவது பெயரிலாவது அனுமதி பெற்று இருக்கிறார்களா? எத்தனை தளத்திற்கு அனுமதிப் பெற்று உள்ளார்கள்? என்பது குறித்து விசாரணை நடைபெற்று வருகிறது. இவ்விடத்தில், ஏற்கனவே இருந்த கிணற்றினை மூடி அதில் எழுப்பப்பட்டிருந்த தூண் சரிந்ததால் இந்த விபத்துக்குக் காரணம் என முதல் கட்ட விசாரணையில் தெரியவந்துள்ளது" என்றார்.

இந்த சம்பவத்தை நேரில் கண்ட கவிதா மற்றும் மகேஸ்வரி ஆகியோர் கூறுகையில், "7 பேர் வேலை செய்து கொண்டிருக்கும்போதே திடீரென பெரும் சத்தத்துடன் அந்தக் கட்டடம் சரிந்தது. அப்போது,எதிரே உள்ள கட்டடத்தில் வேலை பார்த்த நபர்கள் ஓடிவந்து சிக்கியவர்களை காப்பாற்ற முயன்றனர். கட்டடம் இடிந்து விழுந்ததும் இந்தப் பகுதி முழுவதும் ஒரே புகை மூட்டம் ஆனதால் எதுவும் தெரியாத நிலையில் எங்களால் ஒன்றும் செய்ய முடியவில்லை" என்றனர்.

இச்சம்பவம் குறித்து செக்காணூரணி காவல்துறை வழக்குப் பதிவு செய்து விசாரணை மேற்கொண்டு வருகிறது.