நடைபெற்று முடிந்த 17ஆவது மக்களவைத் தேர்தலில் மதுரை மக்களவைத் தொகுதியில் மார்க்சிஸ்ட் கம்யூனிஸ்ட் வேட்பாளர் சு.வெங்கடேசன் நான்கு லட்சத்திற்கு மேலான வாக்குகள் பெற்று வெற்றியடைந்தார். இவரது வெற்றியை மதுரை மக்கள் மட்டும் அல்ல தமிழ்நாடே கொண்டாடிவருகிறது. இந்நிலையில், மதுரை மார்க்சிஸ்ட் கட்சி அலுவலகத்தில் மக்களவை உறுப்பினர் சு.வெங்கடேசன் செய்தியாளர்களை சந்தித்து பேசினார்.
அப்போது, 'எனது வெற்றிக்காக பாடுபட்ட அனைவருக்கும் நெஞ்சார்ந்த நன்றியை தெரிவித்துக்கொள்கிறேன். எங்கள் தேர்தல் அறிக்கையில் உள்ளது போல, ஆலோசனைக் குழு ஒன்றை அமைத்து மதுரையின் வளர்ச்சிக்காக அனைவருடன் இணைந்து செயல்படுவேன். இது மன்னர் ஆட்சி அல்ல; ஜனநாயக யுகம். அதில் எதிர்க்கட்சியின் பங்கு மிக முக்கியம். ஒரு தட்டு மட்டும் இருந்தால் அது சாப்பிட மட்டுமே பயன்படும். ஆனால் இரண்டு தட்டு இருந்தால்தான் அது நீதியை நிலை நாட்டும்.
தமிழ்நாட்டில் திமுக சார்பில் வெற்றிபெற்ற 37 பேரும் இந்திய முகமாக செயல்படுவார்கள். மதுரையின் வளர்ச்சிக்காக அதிமுகவின் இரண்டு அமைச்சர்களுடன் சேர்ந்து செயல்படுவோம். கம்யூனிஸ்டுகள் எந்த காலத்திலும் நல்ல திட்டங்களுக்கு தடையாக இருந்தது இல்லை. நல்ல திட்டங்களை கொண்டு வருவதற்கான போராட்டங்களையே நாங்கள் நடத்தியுள்ளோம். மதுரையின் நலனுக்காக அனைத்துக் கட்சிகளுடனும் இணைந்து செயல்பட கம்யூனிஸ்டாக எங்களுக்கு எந்த தடையும் இல்லை' என்றார்.