ஹெல்மெட் அணியாமல் வந்த ரயில்வே டிடிஆர்: காவலர்களை திட்டும் வைரல் வீடியோ!

மதுரை: ஹெல்மெட் அணியாமல் வந்த ரயில்வே டிடிஆர் குருசாமி என்பவர், காவலர்களை தரக்குறைவாக பேசியதால் காவல்துறையினர் அவரை கைது செய்தனர். இந்த வீடியோ காட்சி தற்போது சமூக வலைதளங்களில் வைரலாகி வருகிறது.

மதுரை திடீர் நகரின் காவல் ஆய்வாளராக பணியாற்றி வரும் முருகேசன், மேல மாரட் வீதி சந்திப்பில் வாகன சோதனையில் ஈடுபட்டு கொண்டிருந்தார்.

அப்போது, மதுரை ரயில் நிலையத்தில் டிடிஆர்-ஆக பணியாற்றி வரும் டாக்டர் சுந்தர்ராஜன் நகர் பகுதியைச் சேர்ந்த குருசாமி என்பவர் அந்த வழியாக சென்றார். ஹெல்மெட் அணியாமல் இருசக்கர வாகனத்தை இயக்கிய அவரை தடுத்து நிறுத்திய காவலர்கள், அபராதம் செலுத்த வேண்டும் என்று கூறியுள்ளனர். இதற்கு மறுப்பு தெரிவித்த டிடிஆர், காவலர்களுடன் வாக்குவாதத்தில் ஈடுபட்டார்.

பின்னர், காவல் ஆய்வாளரிடம் தரக்குறைவாக பேசியும், பணி செய்ய விடாமல் தடுத்ததாகவும் திடீர் நகர் காவல்துறையினர் இரண்டு பிரிவுகளின் கீழ் வழக்குப் பதிவு செய்து டிடிஆர் குருசாமியை கைது செய்தனர். இதையடுத்து ஹெல்மெட் அணியாமல் வந்த ரயில்வே டிடிஆர், காவல்துறையினரை தரக்குறைவாக பேசும் வீடியோ சமூக வலைதளங்களில் வைரலாகி வருகிறது.