தென் மாவட்ட ரயில்கள் தாமதம்: தென்னக ரயில்வே அறிவிப்பு

ரயில் இயக்கம் கணினிமயமாக்கப்பட்ட நிலையில், தொழில்நுட்பல் கோளாறு காரணமாக தென் மாவட்டங்களில் இருந்து சென்னை சென்று வரும் ரயில்களின் இயக்கத்தில் நேற்று தாமதம் ஏற்பட்டதாக, தென்னக ரயில்வேயின் மதுரைக் கோட்டம் தெரிவித்துள்ளது.

இது குறித்து தென்னக ரயில்வே, மதுரை கோட்டம் வெளியிட்டுள்ள செய்திக் குறிப்பில், "திருமங்கலம் - துலுக்கப்பட்டி ரயில் நிலையங்களுக்கு இடையே புதிய இரட்டை ரயில் பாதை அமைக்கப்பட்டுள்ளது. இந்தப் புதிய இரட்டை ரயில் பாதையின் இணைப்புப் பணிகள் கடந்த 10 நாள்களாக நடைபெற்று வந்தன. மின்னணு அடிப்படையில் ரயில் இயக்கம் நடைபெற்று வந்த நிலையில், தற்போது ரயில் இயக்கம் கணினிமயமாக்கப்பட்டுள்ளது.

இந்நிலையில், கணினிமயமாக்கும் பணியில் ஏற்பட்டுள்ள தொழில்நுட்பக் கோளாறு காரணமாக இந்தத் தாமதம் ஏற்பட்டுள்ளது. இதனால், நேற்று (மார்ச்.30) சென்னை செல்லும் கொல்லம், பொதிகை, கன்னியாகுமரி, முத்துநகர், அனந்தபுரி, செந்தூர் சிறப்பு ரயில்கள் மற்றும் நாகர்கோவில், பெங்களூர் சிறப்பு ரயில்கள் ஆகியவை தாமதமாக இயக்கப்பட்டு வருகின்றன.

அதேபோல், சென்னையில் இருந்து தென் மாவட்டங்களுக்கு வரும் கொல்லம், பொதிகை, முத்துநகர், அனந்தபுரி, செந்தூர், சிறப்பு ரயில்கள் மற்றும் கோவை-நாகர்கோவில், பெங்களூர்-நாகர்கோவில், டெல்லி நிஜாமுதீன்-கன்னியாகுமரி சிறப்பு ரயில்களும் தாமதமாக இயக்கப்பட்டு வருகின்றன. இன்று (மார்ச்.31) அதிகாலை 3 மணியிலிருந்து ரயில்கள் வழக்கம்போல் இயங்கத் தொடங்கியுள்ளதாகவும் அதில் குறிப்பிடப்படுள்ளது.

இதையும் படிங்க:இரட்டை அகலப்பாதையில் அதிவேகத்தில் ரயில் இயக்கி சோதனை