விபத்தில் உயிரிழந்த மதுரை கபடி வீரருக்கு காப்பீட்டு காசோலையை வழங்கிய தமிழ்நாடு அமெச்சூர் கபடி கழகம்!

Fund for Madurai Kabaddi player: விபத்தில் உயிரிழந்த மதுரையைச் சேர்ந்த கபடி வீரருக்கு விபத்து காப்பீடுத் திட்டத்தின் மூலம் ரூ.5 லட்சத்திற்கான காசோலையை, அவரது குடும்பத்திற்கு தமிழ்நாடு அமெச்சூர் கபடிக் கழகம் வழங்கியது.

மதுரை: மதுரை வண்டியூரைச் சேர்ந்தவர், பாலமுருகன். பில்டிங்க் காண்டிராக்டரான இவருக்கு சரவணகுமார் என்ற மகனும், 9ஆம் வகுப்பு படிக்கும் ஒரு மகளும் உள்ளனர். சரவணகுமார் விருதுநகரில் உள்ள பொறியியல் கல்லூரி ஒன்றில் சிவில் இன்ஜினீயர் முடித்துவிட்டு, இரண்டு வருடமாக தனியார் நிறுவனம் ஒன்றில் வேலை பார்த்து வருகிறார்.

சரவணகுமார் 6ஆம் வகுப்பு படிக்கும்போதே, விளையாட்டின் மீது மிகுந்த ஆர்வம் கொண்டவராகத் திகழ்ந்துள்ளார். இந்த நிலையில், கடந்த சில வருடங்களாக மாநில அளவிலான கபடி போட்டிகளில் விளையாடி பல்வேறு பரிசுகளையும் குவித்துள்ளார்.

இந்த நிலையில், கடந்த அக்டோபர் 9ஆம் தேதி பொள்ளாச்சி அருகே இருசக்கர வாகனத்தில் சென்றபோது விபத்து ஏற்பட்டு அவர் உயிரிழந்தார். இந்த நிலையில், அவருக்கு இன்று (டிச.30) வண்டியூரில் மெளன அஞ்சலி செலுத்த, அவருடன் விளையாடிய விளையாட்டு வீரர்கள் 50க்கும் மேற்பட்டோர், தமிழ்நாடு அமெச்சூர் கபடி கழக மாநிலத் தலைவர் சோலை ராஜா தலைமையில் ஊர்வலமாக வந்தனர்.

இதன் தொடர்ச்சியாக, அவரது திருவுருவப் படத்திற்கு மாலை அணிவித்து மலர் தூவி அஞ்சலி செலுத்தினர். அதன் பின்னர், உயிரிழந்த கபடி வீரருக்கு விபத்து காப்பீடுத் திட்டத்தின் மூலம் 5 லட்சம் ரூபாய்க்கான காசோலையை, தமிழ்நாடு அமெச்சூர் கபடி கழக மாநிலத் தலைவர் சோலை ராஜா, வேலம்மாள் மருத்துவமனை தலைமைச் செயல் அதிகாரி மணிவண்ணன், ராயல் சுந்தரம் இன்சூரன்ஸ் கிளை மேலாளர் பாலமுருகன் மற்றும் பொதுநல காப்பீட்டு அதிகாரி தாயுமான சுந்தரம் ஆகியோர் சரவணகுமாரின் தந்தை பாலமுருகனிடம் வழங்கினர்.

மேலும், இந்த நிகழ்விற்கு வந்த சரவணகுமாரின் நண்பர்கள் மற்றும் சகவிளையாட்டு வீரர்கள் அனைவரும் சரவணகுமாரின் திருவுருவப் படத்திற்கு மாலை அணிவித்து, மலர் அஞ்சலி செலுத்தினர் என்பது குறிப்பிடத்தக்கது.

இதையும் படிங்க:2023ஆம் ஆண்டின் ஆசிய விளையாட்டு போட்டியில் உலக கவனத்தை ஈர்த்த தங்க தமிழர்கள்..