கைலாசா நாட்டில் ஜல்லிக்கட்டு நடத்த கோரிக்கை - நித்திக்கு கடிதம் எழுதிய மதுரை இளைஞர்!

மதுரை: 2021ஆம் ஆண்டு கைலாசா நாட்டில் ஜல்லிக்கட்டு நடத்தக் கோரி மதுரையைச் சேர்ந்த இளைஞர், இந்திய அரசால் தேடப்படும் பாலியல் குற்றவாளியான நித்தியானந்தாவுக்கு கடிதம் எழுதியுள்ளார்.

மதுரை வளையங்குளத்தைச் சேர்ந்தவர் வீர ராமர். தனியார் நிறுவனத்தில் பணிபுரிந்து வரக்கூடிய இவர், வீர விளையாட்டுகள் மீது கொண்ட ஆர்வத்தினால் தனது வீட்டில் இரண்டு ஜல்லிக்கட்டு காளைகளை வளர்த்து வருகிறார். இந்தக் காளைகள் வருடந்தோறும் நடைபெறும் ஜல்லிக்கட்டு போட்டியிலும் பங்கெடுத்து வருகின்றன.

இந்நிலையில், சமீபத்தில் கைலாசா என்கிற நாட்டை உருவாக்கியுள்ளதாகக் கூறியுள்ள நித்தியானந்தா, தனது கைலாச நாட்டில் குடியேற விரும்புவோர்கள் இ-பாஸ்போர்ட் மூலம் விண்ணப்பிக்கலாம் என்று அறிவிப்பை வெளியிட்டிருந்தார்.

சில நாட்களுக்கு முன்னதாக, பல்வேறு கிளைகள் கொண்ட மதுரை டெம்பிள் சிட்டி உணவகத்தின் கிளையை கைலாசாவில் தொடங்குவதற்கு அனுமதி வேண்டி அதன் உரிமையாளர் குமார் நித்தியனந்தாவிற்கு கோரிக்கை வைத்து கடிதம் எழுதி இருந்தார். அதனைத் தொடர்ந்து கைலாச நாட்டில் விவசாயம் செய்ய அனுமதி கேட்டு விவசாயி பாண்டித்துரை என்பவரும் கடிதம் எழுதியிருந்தார்.

இந்த வரிசையில் தற்போது மதுரையைச் சேர்ந்த வீர ராமர் நித்யானந்தாவின் கைலாச நாட்டில் வருகின்ற 2021ஆம் ஆண்டு ஜல்லிக்கட்டு போட்டிகள் நடத்த அனுமதி கோரி மதுரையின் வீர மரபு வீர விளையாட்டுக் கழகம் சார்பில் கடிதம் எழுதியுள்ளார்.

தான் வளர்க்கும் காளையுடன் வீர ராமர்

இதுகுறித்து அவரிடம் கேட்டபோது, உலகம் முழுவதும் பல்வேறு நாடுகளில் கரோனா நோய் தொற்று அதிகரித்துள்ளதால், கோயில் விழாக்கள் மற்றும் வீர விளையாட்டுகளை நடத்துவது சவாலாக உள்ளது. கரோனா நோய்த் தொற்றின் தாக்கமே இல்லாத கைலாச நாட்டில் ஜல்லிக்கட்டு போட்டியை நடத்த அனுமதிக்க வேண்டும் என்று தமிழரான நித்தியானந்தாவிற்கு கடிதம் மூலம் கோரிக்கை விடுத்துள்ளோம் என கூறினார்.

இதையும் படிங்க:கைலாசா நாட்டில் உணவகம் வைக்க அனுமதி கேட்பதா? - ஆட்சியரிடம் புகார்