கீழடியை மிஞ்சும் உலைப்பட்டி - கி.மு ஐந்தாம் நூற்றாண்டு இரும்பு உலை கண்டுபிடிப்பு

கீழடியைப் போன்றே மதுரை அருகே மற்றொரு தொல்லியல் மேடு ஆய்வாளர்களால் கண்டறியப்பட்டுள்ளது. இங்கு கிமு ஐந்தாம் நூற்றாண்டைச் சேர்ந்த இரும்பு உருக்கும் உலை இருந்ததும் தெரியவந்துள்ளது.

மதுரை மாவட்டம் உசிலம்பட்டி அருகிலுள்ள சூலப்புரம் ஊராட்சியைச் சேர்ந்த உலைப்பட்டி கிராமத்தின் மேற்குபுர மலையடிவாரத்தில் பல ஏக்கர் கணக்கில் கிமு 2000 - 3000 காலகட்டத்தைச் சேர்ந்த ஈமக்காடு பரந்து விரிந்து காணப்படுகின்றன.

முதுமக்கள் தாழிகள், கல் வட்டங்கள், குத்துக்கல், கற்பலகைகள் என இறந்தோரின் நினைவாக உருவாக்கப்படும் அனைத்து ஈம சின்னங்களும் இங்கு உள்ளன. அதுமட்டுமன்றி 2500 ஆண்டுகளுக்கு முற்பட்ட இரும்பு உருக்கும் உலை ஒன்றும் கண்டறியப்பட்டுள்ளது. இந்த இடத்தில் கன்னங்கரிய நிறத்திலான இரும்புக் கழிவுகள் குவியலாக காணப்படுகின்றன.

இதுகுறித்து தொல்லியல் அலுவலர் சக்திவேல் கூறுகையில், "இப்பகுதியைச் சேர்ந்த காந்திகிராம கிராமியப் பல்கலைக்கழக பொருளாதார உதவிப் பேராசிரியர் முமுருகேசன் மனோன்மணியம் சுந்தரனார் பல்கலைக் கழக வரலாற்று துறை உதவிப் பேராசிரியர் சென்றாய பெருமாள் ஆகியோர் வழங்கிய தகவலின் அடிப்படையில் இந்த ஆய்வு மேற்கொள்ளப்பட்டது. இப்பகுதியில் பெருங்கற்கால ஈமச்சின்னங்கள் அதிக அளவில் காணப்படுகின்றன. பல்வேறு காலகட்டங்களில் நடைபெற்ற ஈம நடைமுறைகளை இங்கே காண முடிகிறது. இந்தப் பகுதியில் விரிவான கள ஆய்வுகள் மேற்கொள்ளப்படும் போது மிகப்பெரிய வரலாற்று உண்மைகள் வெளியே தெரிய வாய்ப்பு உள்ளது" என்றார்.

மேற்கு மலைத் தொடரின் ஒரு பகுதியாக அமைந்துள்ள இந்த மலை அடிவாரத்தில் காணும் இடம் எங்கும் தாழிகளும் பானை ஓடுகளும் ஆங்காங்கே எலும்புத் துகள்களும் பரவலாக காணப்படுகின்றன. இறந்தோர் நினைவாக அவர் பயன்படுத்திய பொருட்களை புதைத்த கலயங்கள் முழு வடிவத்தில் கிடைக்கின்றன.

இது குறித்து அருகிலுள்ள சூலப்புரம் கிராமத்திலுள்ள இந்து ஆரம்பப்பள்ளியில் தலைமையாசிரியராக பணியாற்றி ஓய்வு பெற்ற அழகர்சாமி கூறுகையில், "இந்த மலை அடிவாரப் பகுதியில் ஊர்கள் இருந்ததாகவும், அங்கே மக்கள் வாழ்ந்ததாகவும் எனது முன்னோர்கள் கூறக் கேட்டிருக்கிறேன். இந்தப் பகுதியில் தற்போதும் பல்வேறு பழமையான பொருள்கள் கிடைத்து வருகின்றன. ஆகையால் தமிழ்நாடு அரசு மிக விரிவான அளவில் ஆராய்ச்சி மேற்கொள்ள வேண்டும்" என வேண்டுகோள் வைத்தார்.

பானை

காந்திகிராம கிராமியப் பல்கலைக்கழக பொருளாதாரத் துறையில் கெளரவ பேராசிரியராக பணியாற்றும் முனைவர் முருகேசன் கூறுகையில், "இங்கு வாழ்ந்த மக்கள் சமூக, பொருளாதார, கலை, பண்பாட்டு வளர்ச்சியோடு வாழ்ந்தார்கள் என்பதை உலகறியச் செய்ய வேண்டும் என்பதே எங்கள் நோக்கம். தன்னார்வத்தோடு இந்த பகுதியில் அலைந்து திரிந்து நாங்கள் இதனை கண்டறிந்து தொல்லியல் துறைக்கு தகவல் கொடுத்துள்ளோம்" என்றார்.

மலையிலிருந்து கல்லெடுத்து இறந்தோரை நினைத்து வழிபடுகின்ற மரபின் தொடர்ச்சி அந்தப் பகுதியில் தற்போதும் இருக்கிறது என்பதுதான் வியப்புக்குரிய ஒன்று. இந்த மலை அடிவார பகுதியில் அமைந்துள்ள மாலை சாமி என்ற கிபி 15ஆம் நூற்றாண்டு கோயில் ஒன்று இதனை உறுதி செய்கிறது.

அக்கோயிலின் பூசாரி செல்லத்துரை கூறுகையில், எங்களது முன்னோர்கள் இறந்ததற்கு பிறகு அவர்களின் நினைவாக மலையிலிருந்து கல்லெடுத்து இங்கே நடுவது வழக்கம். அதனை ஒப்பக்கல் என்று அழைத்து வருகிறோம். தண்ணீர், மஞ்சள், கோமியம், பால் ஆகியவற்றால் கழுவி சுத்தம் செய்து அவர்களின் நினைவாக அந்த ஒப்பக் கல்லை இங்கே நட்டு வைத்து வழிபடுகிறோம்" என்கிறார்.

பானை

நீத்தாரை நினைவூட்டும் நீண்ட நெடிய மரபும் பண்பாடும் தமிழர்களிடையே தொன்று தொட்டு இன்றளவும் நிலவி வருகிறது. இந்த மரபார்ந்த எச்சங்களை ஏதேனும் ஒரு வகையில் இந்த மண் தனக்குள் புதைத்து வைத்து, ஒவ்வொரு கால கட்டத்திலும் அதனை உலகமே அறிய வெளியே தந்துகொண்டே இருக்கிறது. கீழடியை போன்று உலைப்பட்டியையும் தமிழ்நாடு தொல்லியல்துறை கவனத்தில் கொண்டால்உலைப்பட்டியையும் வரலாற்றுப்பூர்வ தொல்லியல் களமாகத்தான் நாளைய உலகம் நிச்சயம் பேசும்.

இதையும் படிங்க: 'தமிழி' எழுத்து வரலாற்றில் முக்கியத் திருப்புமுனை; 'மா' மதுரையில் கண்டெடுக்கப்பட்ட அரிய பொக்கிஷம்!