தசை சிதைவு நோயால் பாதிக்கப்பட்ட சிறுவனைக் குணப்படுத்தி அரசு மருத்துவர்கள் சாதனை

மதுரை: அரிய வகை தசை சிதைவு நோயால் பாதிக்கப்பட்ட இரண்டரை வயது சிறுவனை முற்றிலும் குணப்படுத்தி அரசு இராசாசி மருத்துவமனை மருத்துவர்கள் சாதனை படைத்துள்ளனர்.

மதுரை பசுமலையைச் சேர்ந்த ராமமூர்த்தி என்பவர் இரும்புக் கடையொன்றில் வேலை பார்த்துவருகிறார். இவருடைய இரண்டரை வயது மகன் விக்னேஷ்வரன், குல்லியன் பாரி சின்ரோம் என்கிற அரியவகை தசை சிதைவு நோயால் பாதிக்கப்பட்டிருந்தார்.

இந்நிலையில், மதுரை இராசாசி மருத்துவமனையில் சிறுவன் விக்னேஷ்வரன் அனுமதிக்கப்பட்டார். அங்கு அவருக்கு சுவாச சிகிச்சை அளிக்கப்பட்டது. இச்சிகிச்சை 210 நாள்களுக்கு மேலாக அளிக்கப்பட்டது. மேலும், விலையுயர்ந்த மருந்துகள் கொடுக்கப்பட்டு, குழந்தைகள் நல மருத்துவர்களில் தீவிரக் கண்காணிப்பில் சிறுவன் தற்போது முற்றிலும் குணமாகியுள்ளார்.

இந்தச் சிகிச்சைக்கு தனியார் மருத்துவமனையில் 1 கோடி ரூபாய் வரை செலவாயிருக்கும். ஆனால் அரசு இராசாசி மருத்துவமனையில் முதலமைச்சர் மருத்துவக் காப்பீட்டுத் திட்டம் மூலம் இலவச சிகிச்சையளித்து, சிறுவனை முற்றிலும் குணப்படுத்திய அரசு மருத்துவர்களுக்கு பாரட்டுகள் குவிந்துவருகின்றன.

இதையும் படிங்க: மதுரையில் டிரான்ஸ்ஃபார்மரைப் பிடித்து ராணுவ வீரர் தற்கொலை முயற்சி