மதுரை மீனாட்சி அம்மன் கோயிலைச் சுற்றி கடந்த ஒரு மாதத்தில் மட்டும் மூன்று தீ விபத்து சம்பவங்கள் நடந்துள்ளன. தீபாவளி தினத்தன்று (நவ.14) ஜவுளிக்கடையில் ஏற்பட்ட தீயை அணைக்க முயன்ற இரண்டு தீயணைப்பு வீரர்கள், கட்டடம் இடிந்து விழுந்ததில் உயிரிழந்தனர். இதற்கு அந்த ஜவுளிக்கடை பழமையான கட்டடத்தில் இயங்கியதுதான் காரணம் எனத் தெரியவந்தது.
இதனையடுத்து தமிழ்நாடு தீயணைப்பு மற்றும் பேரிடர் மீட்புத் துறையின் ஐஜி ஜாபர் சேட், சம்பவ இடத்தைப் பார்வையிட்டு பழமையான கட்டடங்கள் குறித்து ஆய்வுசெய்ய உத்தரவிட்டிருந்தார். அதன்படி மதுரை மீனாட்சி அம்மன் கோயிலைச் சுற்றியுள்ள பழமையான கட்டடங்கள் குறித்தும் ஆய்வுநடத்தப்பட்டு, முதற்கட்டமாக 500 வணிக நிறுவனங்களுக்கு தீயணைப்புத் துறை சார்பில் நோட்டீஸ் அனுப்பப்பட்டது.