'ஜல்லிக்கட்டு வன்முறை விசாரணை அறிக்கை செப்டம்பரில் தாக்கல்' - நீதிபதி ராஜேஸ்வரன்

மதுரை: "ஜல்லிக்கட்டு வன்முறை விசாரணை ஆணையத்தின் முழு அறிக்கையும் வரும் செப்டம்பர் மாதம், தமிழக அரசிடம் தாக்கல் செய்யப்படும்" என, நீதிபதி ராஜேஸ்வரன் தெரிவித்தார்.

சென்னை மெரினாவில் கடந்த 2017ம் ஆண்டு ஜல்லிக்கட்டு உரிமைக்காக போராட்டம் நடைபெற்றது. போராட்டத்தின் இறுதியில் பொதுமக்களை கலைந்து செல்வதற்காக போலீஸார் தடியடி நடத்தியதால் கலவரமானது. இதுதொடர்பாக, அன்றைய முதலமைச்சர் ஓ. பன்னீர்செல்வம் விசாரணை ஆணையம் ஒன்றை அமைத்தார்.

ஓய்வு பெற்ற நீதிபதி ராஜேஸ்வரன் தலைமையிலான அந்த ஆணையம், மதுரை, திருச்சி, கோயம்புத்தூர், சென்னை உள்ளிட்ட இடங்களுக்கு பயணம் செய்து விசாரணை நடத்தி வந்தது. மதுரையில் நடந்த விசாரணை இன்றுடன் நிறைவடைந்தது. இதையடுத்து நீதிபதி ராஜேஸ்வரன் விருந்தினர் மாளிகையில் இன்று செய்தியாளர்களை சந்தித்தார்.

அப்போது அவர் கூறுகையில், ஜல்லிக்கட்டு உரிமைக்கான போராட்டத்தில் கடைசி நாள் நடைபெற்ற வன்முறை குறித்த விசாரணை மதுரையை பொருத்தவரை முழுவதுமாக முடிவடைந்துவிட்டது. மதுரையில் மட்டும் சுமார் 1002 மனுக்கள் பெறப்பட்டு, மொத்தம் 1,018 பேர் விசாரணைக்கு அழைக்கப்பட்டனர்.

விசாரணை முடிவில் ஒட்டு மொத்தமாக பெறப்பட்ட இந்த மனுக்களில் 511 பேர் ஒரே மாதிரியான நிகழ்வுகளில் புகார் அளித்திருந்தனர். ஆகையால் விசாரணை ஆணையம் அந்த மனுக்களை நிராகரித்தது.

சம்மன் அனுப்பியும் வராதவர்கள் 257 பேர். தவிர மீதமுள்ள அனைவரையும் விசாரணை ஆணையம் முழுவதுமாக விசாரித்துள்ளது. இந்த விசாரணையில் பெரும்பாலும் அனைத்து தரப்பு பொதுமக்களும் இறுதியில் நடைபெற்ற வன்முறைக்கு, வெளியிலிருந்து வந்த நபர்களின் தூண்டுதல் தான் காரணம் என்று கருத்து தெரிவித்துள்ளனர். காவல்துறை மீது இவர்கள் அளித்துள்ள புகார் என்பது மிகக் குறைவு.

ஜல்லிக்கட்டு வன்முறை குறித்த விசாரணை, மதுரையை பொறுத்தவரை முடிவடைந்துவிட்டது. இனி சென்னையில் விசாரணை தொடரும். அங்கும் விசாரணை முடிந்த பிறகு வருகின்ற செப்டம்பர் மாதம் முழு அறிக்கையையும் தமிழக அரசிடம் தாக்கல் செய்வோம். அதில் சில பரிந்துரைகளும் இடம்பெறும், என்றார்.