பெட்ரோல் நிலையங்கள் திறப்பது அரசின் கொள்கை முடிவு - மத்திய அரசு பதில்

மதுரை: புதிய பெட்ரோல் நிலையங்கள் திறப்பது அரசின் கொள்கை முடிவு, அதில் நீதிமன்றம் தலையிட முடியாது என உயர்நீதிமன்ற மதுரைக் கிளையில் மத்திய அரசு பதில் அளித்துள்ளது.

திண்டுக்கல் மாவட்டம் வேடசந்தூரைச் சேர்ந்த வெங்கிடுசாமி என்பவர் உயர்நீதிமன்ற மதுரைக்கிளையில் பொதுநல வழக்கு ஒன்றை தாக்கல் செய்திருந்தார். அதில், 'தமிழ்நாடு ஊரக பகுதிகளில் பெட்ரோல் பங்குகளை தொடங்குவதற்கான டெண்டர் அறிவிப்பை இந்தியன் ஆயில் கார்ப்பரேஷன் லிமிடெட், பாரத் பெட்ரோலியம் கார்ப்பரேஷன் லிமிடெட், ஹிந்துஸ்தான் பெட்ரோலியம் கார்ப்பரேஷன் லிமிடெட் நிறுவனங்கள் 2018 நவம்பர் 25ல் வெளியிட்டன. இதனால், ஏற்கனவே பெட்ரோல் நிலையங்கள் வைத்திருப்போர் பாதிக்கப்படுவர்.

பெட்ரோலுக்கான மாற்று எரிபொருள் கொள்கையை மத்திய அரசு அறிவித்திருக்கும் நிலையில், பெட்ரோல் பங்குகளின் எண்ணிக்கையை அதிகரிப்பது குறித்த அறிவிப்பாணை வெளியிடப்பட்டிருப்பது முரணாக உள்ளது. ஆகவே, புதிதாக 5125 பெட்ரோல் பங்குகள் அமைப்பது தொடர்பான டெண்டர் அறிவிப்புக்கு தடை விதித்தும், பெட்ரோல் பங்குகள் அமைப்பதால் ஏற்படும் தீங்குகள் குறித்து ஆராய நிபுணர் குழுவை அமைக்கவும் உத்தரவிட வேண்டும்" என குறிப்பிட்டிந்தார்.

இந்த நிலையில் இவ்வழக்கு, நீதிபதிகள் ரவிச்சந்திர பாபு, செந்தில்குமார் ராமமூர்த்தி ஆகியோர் முன்னிலையில் இன்று விசாரணைக்கு வந்தது. அப்போது பெட்ரோலிய நிறுவனங்கள் தரப்பில் ஆஜரான மூத்த வழக்கறிஞர், முந்தைய காலத்தை விட தற்போது வாகனங்கள் பெருகிவிட்ட நிலையில், அதிக பெட்ரோல் நிலையங்கள் தேவைப்படுகின்றன. இது அரசின் கொள்கை ரீதியான முடிவு. இதில் நீதிமன்றம் தலையிட முடியாது. மேலும் அரசு விதிக்கப்பட்ட அனைத்து விதிகளையும் பின்பற்றிதான் பெட்ரோல் நிலையங்கள் அமைக்கப்படுவதாக பதில் மனு தாக்கல் செய்தனர்.

இதனையடுத்து இந்த வழக்கு விசாரணையை ஆகஸ்ட் 21 ஆம் தேதிக்கு நீதிபதிகள் ஒத்திவைத்தனர்.