கரோனா பாதிப்பு சிறப்பு முகாம் - நோய்த் தொற்று அச்சத்தால் மக்கள் சாலை மறியல்

மதுரை: விமான நிலையத்தின் அருகில் உள்ள கிராமத்தில் கரோனா பாதிப்பு உள்ளவர்களுக்கு சிறப்பு முகாம் ஏற்படுத்தப்பட்டதை அடுத்து, நோய்த் தொற்று அச்சத்தால் 300க்கும் மேற்பட்ட பொதுமக்கள் சாலை மறியல் போராட்டத்தில் ஈடுபட்டனர்.

கரோனா தாக்குதலால் இந்தியாவில் தற்போது வரை நான்கு பேர் உயிரிழந்துள்ளனர். மேலும் தமிழ்நாட்டில் மூன்று பேருக்கு கரோனா தொற்று இருப்பது உறுதி செய்யப்பட்டுள்ளது.

இந்நிலையில், கரோனா அறிகுறியுடன் மதுரை விமான நிலையத்திற்கு வரும் பயணிகளை தங்க வைப்பதற்கான முகாமினை மாவட்ட அலுவலர்கள் சின்ன உடைப்பு என்ற கிராமத்தில் உள்ள அரசு கூட்டுறவு பயிற்சி கல்லூரியில் ஏற்படுத்தியுள்ளனர். தற்போது 120 நோயாளிகள் வரையில் தங்க வைப்பதற்காக ஏற்பாடுகள் செய்யப்பட்டுள்ளன.

இதனால் தங்களுக்கு கரோனா பாதிப்பு ஏற்படும் என்ற அச்சத்தில் சுமார் 300க்கும் மேற்பட்ட ஊர் மக்கள் திருமங்கலம் நான்கு வழிச்சாலையில் போராட்டத்தில் ஈடுபட்டனர். தொடர்ந்து கூட்டுறவு பயிற்சி மையத்திற்குச் செல்லும் வழியெங்கும் முள்செடிகளை வெட்டிப்போட்டு, கல்லூரி முன்பு குழி தொண்ட ஜேசிபி இயந்திரத்தை நிறுத்தியுள்ளனர்.

இதையும் படிங்க:எமன் வேடமணிந்து கரோனா விழிப்புணர்வு ஏற்படுத்திய ரயில்வே காவல்துறையினர்!