முறைகேடுகளின் புகலிடம் ஆவின் நிர்வாகம் - பால் முகவர்கள் சங்கம் குற்றச்சாட்டு!

மதுரை: முறைகேடுகளின் புகலிடமாக மாறிவரும் ஆவின் நிர்வாகத்தை காப்பாற்ற உயர் நீதிமன்றம் முன்வர வேண்டும் என பால் முகவர்கள் சங்கம் கோரிக்கை விடுத்துள்ளது.

தமிழ்நாடு பால் முகவர்கள் தொழிலாளர்கள் நலச் சங்கத்தின் மாநிலத் தலைவர் பொன்னுசாமி வீடியோ பதிவு ஒன்றை வெளியிட்டுள்ளார்.

அதில், "தமிழ்நாடு அரசின் கூட்டுறவு நிறுவனமான ஆவின் நிறுவனத்தில் பணியாற்றும் உயர் அலுவலர்கள் தொடங்கி ஆளுங்கட்சி பிரமுகர்கள் வரை ஊழல், முறைகேடுகளின் புகலிடமாக மாறிவருகிறது. எனவே ஆவின் நிறுவனத்தில் நடைபெற்று வரும் முறைகேடுகளையும், கூட்டுறவு சங்கங்களில் நடக்கும் மோசடிகள், பணம் கையாடல் போன்றவற்றை தமிழ்நாடு அரசு கண்டுகொள்ளவில்லை.

ஆகையால் உயர் நீதிமன்றம் தாமாக முன்வந்து வழக்குப்பதிவு செய்து ஆவின் நிறுவனத்தைக் காப்பாற்ற நீதிமன்றத்தின் மேற்பார்வையில் விசாரணை நடத்த உத்தரவிட வேண்டும்" என அதில் தெரிவித்துள்ளார்.