கப்பலூர் தொழிற்பேட்டையில் பணிகள் முடங்கும் அபாயம்

மதுரை: வடமாநில தொழிலாளர்கள் சொந்த ஊர்களுக்குத் திரும்புவதால் கப்பலூர் தொழிற்பேட்டையில் பணிகள் முடங்கும் அபாயம் ஏற்பட்டுள்ளது.

மதுரை மாவட்டம் திருமங்கலத்தை அடுத்த கப்பலூர் தொழிற்பேட்டை 700 ஏக்கர் பரப்பளவு கொண்டதாகும். இங்கு 450 சிறு, குறு தொழிற்சாலைகள் இயங்கி வருகின்றன.

கரோனா நோய் தொற்றின் காரணமாக மார்ச் மாதம் முதல் ஊரடங்கு உத்தரவு அமல்படுத்தப்பட்டுள்ள நிலையில், தற்போது மே 17ஆம் தேதியிலிருந்து அதிகபட்சம் 100 தொழிலாளர்களுடன் தொழிற்சாலை இயங்க அரசு அனுமதித்துள்ளதால் தொழில் நிறுவனங்கள் உற்பத்தியைத் தொடங்கியுள்ளன.

கப்பலூர் தொழிற்பேட்டையில் உள்ள 450 நிறுவனங்களில் சுமார் 20 ஆயிரத்திற்கும் மேற்பட்டோர் பணிபுரிகின்றனர். அதேசமயம் ஒடிசா, மகாராஷ்டிரா, மேற்கு வங்காளம் உள்ளிட்ட வடமாநில தொழிலாளர்கள் 20 முதல் 40 சதவீதம் பேர் பணி புரிகின்றனர். இரண்டு மாத ஊரடங்கு காலத்தில் அவர்களுக்கு தங்குவதற்கு இடம், இரண்டு மாதம் சம்பளம் வழங்கப்பட்டது.

இந்நிலையில் அவர்கள் அனைவரும் ஊர் திரும்புவதால் தொழில் தொடங்கும் சமயத்தில் தொழில் முடங்கும் அபாயம் ஏற்பட்டுள்ளதாகவும், இரண்டு மாதங்கள் தொழில்கள் நடைபெறாததால் மின்கட்டணம், தொழிலாளர் வைப்பு நிதி, வங்கி கடன் ஆகியவை செலுத்த முடியாத நிலை உள்ளது என்றும் தொழில் நிறுவனங்கள் தெரிவிக்கின்றன.

மேலும் தற்போதைய சூழலில் வட மாநிலத்தவர்கள் அனைவரையும் வலுக்கட்டாயமாக சொந்த ஊருக்கு அனுப்பாமல் விருப்பப்பட்டவர்கள் மட்டும் அவர்கள் சொந்த மாநிலங்களுக்கு அனுப்ப அரசு நடவடிக்கை எடுக்க வேண்டும் என கப்பலூர் தொழிற்பேட்டையில் தொழிலாளர்களின் தலைவர் ரகுநாதராஜா கோரிக்கை விடுத்துள்ளார்.