முன்களப் பணியாளர்களுக்கு பாதுகாப்பு உபகரணங்கள் வழங்கக்கோரி வழக்கு!

மதுரை: கரோனா தொற்று சூழலில் பணியாற்றிவரும் முன்களப் பணியாளர்களுக்கு பாதுகாப்பு உபகரணங்கள் வழங்கக் கோரிய வழக்கு குறித்து மாநில பேரிடர் மேலாண்மை துறையின் முதன்மைச் செயலர் அறிக்கைத் தாக்கல் செய்ய உயர் நீதிமன்றம் மதுரைக் கிளை உத்தரவிட்டுள்ளது.

மதுரை மாவட்டம் சொக்கிகுளத்தைச் சேர்ந்த சத்யமூர்த்தி என்பவர் உயர் நீதிமன்ற மதுரைக் கிளையில் பொதுநல வழக்கினைத் தாக்கல் செய்துள்ளார். அதில், "தமிழ்நாட்டில் கரோனா தொற்று பரவாமல் தடுப்பதற்காக பல்வேறு நடவடிக்கைகள் எடுக்கப்பட்டு வருகின்றன. இந்த சூழலில் மருத்துவர்கள், காவல் துறையினர், சுகாதாரப் பணியாளர்கள், ஊடகப் பணியாளர்கள் என பலர் களப்பணியாற்றி வருகின்றனர்.

சமீபகாளமாக களத்தில் நின்று பணியாற்றும் ஊழியர்கள் பலருக்கு கரோனா தொற்று பாதிப்பு உறுதி செய்யப்பட்டுள்ளது. கரோனா உறுதி செய்யப்பட்ட பகுதிகளில் பாதுகாப்பு பணியில் ஈடுபட்டுள்ள காவல் துறையினர், அம்மா உணவகத்தில் பணியாற்றும் பணியாளர்கள், ஊடக பணியாளர்கள், தூய்மை பணியாளர்கள் என பலரும் பொதுநலத்துடன் பணியாற்றி வருகின்றனர்.

நெருக்கடி மிகுந்த இந்த காலத்தில் முன்களப் பணியாளர்களின் பாதுகாப்பு உறுதி செய்யப்பட வேண்டியது அவசியம். ஆகவே மருத்துவர்கள், காவல் துறையினர், சுகாதாரப் பணியாளர்கள், ஊடகப் பணியாளர்கள், வருவாய் அலுவலர்கள், அரசு, அரசு சாராத தன்னார்வலர்களின் பாதுகாப்பை உறுதி செய்யும் வகையில் உடலை முழுமையாக பாதுகாக்கும் வகையிலான பாதுகாப்பு ஆடைகள், முகக்கவசங்கள், கையுறைகள் உள்ளிட்டவற்றை வழங்க உரிய நடவடிக்கை எடுக்க உத்தரவிட வேண்டும்" என கூறியிருந்தார்.

இந்த மனு நீதிபதிகள் பி.என்.பிரகாஷ், புகழேந்தி அமர்வு முன்பாக விசாரணைக்கு வந்தது. அப்போது மனுதாரர் தரப்பில் ஆஜரான வழக்கறிஞர் ஹென்றி திபேன், "நேற்று கூட சென்னையில் காவல் உயர் அலுவலர், தூய்மை பணியாளர்கள், ஊடக பணியாளர்கள் உள்பட 21 முன்களப் பணியாளர்களுக்கு கரோனா தொற்று உறுதி செய்யப்பட்டுள்ளது. எனவே முன்களப் பணியாளர்கள் அனைவருக்கும் பாதுகாப்பு உடைகள், முகக்கவசங்கள் வழங்க உத்தரவிட வேண்டும். அவ்வாறு வழங்கப்படுவதை சட்டப்பணிகள் ஆணையம் கண்காணிக்கவும் உத்தரவிட வேண்டும்" என வாதிட்டார்.

அரசு தரப்பில் ஆஜரான வழக்கறிஞர், "இதேபோல் சென்னை உயர் நீதிமன்ற முதன்மை அமர்வில் விசாரணையில் உள்ள வழக்கு மே 22ஆம் தேதிக்கு ஒத்தி வைக்கப்பட்டுள்ளது" எனத் தெரிவித்தார். இதையடுத்து நீதிபதிகள் இந்த வழக்கு குறித்து மாநில பேரிடர் மேலாண்மை துறையின் முதன்மைச் செயலர் நிலை அறிக்கையை தாக்கல் செய்ய உத்தரவிட்டு வழக்கு விசாரணையை மே 20ஆம் தேதிக்கு ஒத்திவைத்தனர்.

இதையும் படிங்க: கோயம்பேடு சந்தையைத் திறப்பது குறித்து பதிலளிக்க மாநகராட்சிக்கு உயர் நீதிமன்றம் உத்தரவு!