மதுரையில் கரோனாவிலிருந்து மீண்ட 240 பேர்

மதுரை: கரோனா வைரஸ் தொற்றால் பாதிக்கப்பட்ட நபர்களில் இதுவரை 240 பேர் பூரண குணமடைந்து வீடுகளுக்குத் திரும்பியுள்ளனர்.

மதுரை அரசு இராசாசி மருத்துவமனை விரிவாக்க கட்டிடத்தின் எதிரே அமைந்துள்ள உயர்தர பல்நோக்கு சிகிச்சை மருத்துவமனை வளாகத்தில் கரோனா தொற்றால் பாதிக்கப்பட்ட நபர்களுக்கு சிறப்பு சிகிச்சை அளிக்கப்பட்டு வருகிறது.

மதுரை, மதுரை புறநகர், விருதுநகர் தூத்துக்குடி உள்ளிட்ட தென் மாவட்டங்களில் இருந்தும் கரோனா வைரசால் பாதிக்கப்பட்ட பல நபர்கள் இங்கே சிகிச்சை பெற்று வருகின்றனர். பிற மாநிலங்களிலிருந்து வந்த மதுரையைச் சேர்ந்த நபர்களும் இங்கேயே தங்கி சிகிச்சை பெற்று வருகின்றனர்.

இதுவரை கரோனா வைரஸ் தொற்றால் பாதிக்கப்பட்ட 317 பேர் அரசு இராசாசி மருத்துவமனையில் சிகிச்சை பெற்றுள்ளனர். அவர்களில் 240 பேர் வைரஸ் தொற்றிலிருந்து பூரண குணமடைந்து வீடுகளுக்குத் திரும்பியுள்ளனர்.

மேலும், மருத்துவமனையில் தற்போது 74 பேர் சிகிச்சை பெற்று வருகின்றனர். இதுவரை கரோனா வைரசால் பாதிக்கப்பட்டு சிகிச்சை பெற்றுவந்த மூன்று பேர் சிகிச்சை பலனின்றி உயிரிழந்துள்ளனர்.