கரூரில் பொதுமக்கள் சாலை மறியல் - போக்குவரத்து பாதிப்பு

கரூர் அடுத்த வெங்கட்கல்பட்டி பகுதியில் அடிக்கடி ஏற்படும் சாலை விபத்துக்களை தடுக்கக் கோரி அப்பகுதி பொதுமக்கள் திடீர் சாலை மறியல் போராட்டத்தில் ஈடுபட்டனர்.

கரூர்: தான்தோன்றிமலையை அடுத்த வெங்கட்கல்பட்டி பகுதியில் கரூர்- திருச்சி தேசிய நெடுஞ்சாலை உள்ளது. நெடுஞ்சாலையில் வரும் கனரக வாகனங்கள் கரூர் நகருக்குள் செல்வதற்காக இப்பகுதிக்கு வருவதால் இங்கு அடிக்கடி விபத்துக்கள் ஏற்படுவதுடன் பொதுமக்கள் சாலையை கடக்க முடியாமல் சிரமப்படுகின்றனர்.

இது தொடர்பாக பலமுறை அலுவலர்களிடம் கோரிக்கை வைத்தும் நடவடிக்கை எடுக்காததால் இன்று (ஆக.4) வெங்கட் திருமா நகர் பகுதியைச் சேர்ந்த 100-க்கும் மேற்பட்ட பொதுமக்கள் மற்றும் விடுதலை சிறுத்தைகள் கட்சி நிர்வாகிகள் இணைந்து சாலையில் அமர்ந்து மறியல் போராட்டத்தில் ஈடுபட்டனர்.

பின்னர் காவல்துறையினர் நடத்திய பேச்சுவார்த்தையில் விரைவில் வேகத்தடை, சிக்னல் ஆகியவை அமைக்கப்பட்டு பொதுமக்களின் கோரிக்கை நிறைவேற்றப்படும் என உறுதியளித்ததையடுத்து பொதுமக்கள் போராட்டத்தை கைவிட்டு கலைந்து சென்றனர்.

இந்த போராட்டம் காரணமாக கரூர் வெள்ளியணை சாலையில் சுமார் ஒரு மணி நேரம் போக்குவரத்து பாதிப்பு ஏற்பட்டது.

இதையும் படிங்க: சிதம்பரத்தில் குடிநீர் இணைப்பு வழங்கியதில் முறைகேடு: லஞ்ச ஒழிப்புத்துறை விசாரணை