செவிலியர் திடீர் ஸ்டிரைக்; கரூர் ஜி.எச்.,யில் நோயாளிகள் அவதி!

கரூர்: அவசர சிகிச்சைப் பிரிவில் சுழற்சி முறையில் செவிலியர்களை நியமிக்க வேண்டும் உட்பட 14 அம்ச கோரிக்கைகளை வலியுறுத்தி கரூர் அரசு மருத்துவமனை செவிலியர் இன்று வேலைநிறுத்தப் போராட்டத்தில் ஈடுபட்டனர்.

கரூர் அரசு மருத்துவக் கல்லூரி மருத்துவமனையில் செவிலியரின் கோரிக்கைகளை நிறைவேற்றாமல் ஊழியர் விரோத போக்கை கடைப்பிடிப்பதாகக் கூறி, அங்கு பணிபுரியும் செவிலியர்கள், இன்று காலை முதல் மருத்துவமனை முன்பாக அமர்ந்து வேலைநிறுத்தப் போராட்டத்தில் ஈடுபட்டனர்.

அவசர சிகிச்சைப் பிரிவில் சுழற்சி முறையில் செவிலியரை நியமிக்கப்பட வேண்டும். அனைத்து நோயாளிகள் பிரிவிலும் செவிலியருக்கான கழிப்பிட வசதிகள் செய்து தரவேண்டும். ரத்தப் பரிசோதனை மேற்கொள்ள ரத்தப் பரிசோதனை ஆய்வக நிபுணர் நியமிக்க வேண்டும் உள்ளிட்ட 14 அம்ச கோரிக்கைகளை வலியுறுத்தி செவிலியர் போராட்டத்தில் ஈடுபட்டனர்.

இவர்களிடம் கரூர் வருவாய் கோட்டாட்சியர் சரவணமூர்த்தி, அரசு மருத்துவக் கல்லூரி மருத்துவமனை முதல்வர் ரோஸி வெண்ணிலா, கரூர் காவல் துணை கண்காணிப்பாளர் ராஜா ஆகியோர் சமரச பேச்சுவார்த்தையில் ஈடுபட்டனர். கோரிக்கைகளுக்கு உரிய தீர்வு எட்டப்படும் என்று உறுதி அளித்ததால், போராட்டத்தைக் கைவிட்டு செவிலியர் மீண்டும் பணிக்குத் திரும்பினர்.

செவிலியர்களின் போராட்டத்தால் அவசர நோயாளிகள் பிரசவ வார்டு, புற நோயாளிகள் பிரிவு பகுதியில் உரிய மருத்துவச் சிகிச்சை கிடைக்காமல் நோயாளிகள் கடும் அவதிக்குள்ளாகினர்.