குமரியில் கால்பதித்த கேசிஆர்!

நாகர்கோவில்: பரபரப்பான அரசியல் சூழ்நிலையில் தெலங்கானா முதலமைச்சர் சந்திரசேகர் ராவ் தனது குடும்பத்தினருடன் நேற்று சூரிய அஸ்தமனத்தை பார்த்து ரசித்தார்.

சர்வதேச சுற்றுலாத் தலமான கன்னியாகுமரிக்கு தெலங்கானா முதலமைச்சர் சந்திரசேகர் ராவ் தனது குடும்பத்தினருடன் நேற்று சென்றார். திருவனந்தபுரத்திலிருந்து ஹெலிகாப்டர் மூலம் அவர் கன்னியாகுமரிக்குச் சென்றுள்ளார்.

புகழ்பெற்ற சூரிய அஸ்தமனத்தினையும் தனது குடும்பத்தினருடன் பார்த்த பின்னர், முக்கடல் சங்கமிக்கும் கடற்கரைக்குச் சென்றுள்ளார். கடற்கரையில் சுற்றுலாப் பயணிகளுடன் மக்களோடு மக்களாக கலந்து தனது சுற்றுலாப் பயணத்தைத் தொடர்ந்தார்.

கூட்டாட்சி கூட்டணி அமைப்பது குறித்து பல்வேறு மாநில முக்கிய அரசியல் கட்சிகளை சந்தித்து பேச்சுவார்த்தை நடத்திவரும் சந்திரசேகர் ராவ் தற்போது, கன்னியாகுமரிக்கு சுற்றுலா சென்றுள்ளது அரசியல் நோக்கர்களிடையே சந்தேகத்தை ஏற்படுத்தியுள்ளது. இந்த சுற்றுலாப் பயணத்தில் கூட அரசியல் இருக்கிறதோ என்ற ஐயத்தையும் எழுப்புகின்றனர்.