தொழிற்சங்க நிர்வாகிகள் உள்ளிருப்பு போராட்டம்!

கன்னியாகுமரி: ஊதிய உயர்வு குறித்த பேச்சுவார்த்தைக்கு உரிய நேரத்தில் அலுவலர்கள் வராததால் தொழிற்சங்கத்தினர் உள்ளிருப்பு போராட்டத்தில் ஈடுபட்டனர்.

கன்னியாகுமரி மாவட்டத்தில் அரசு ரப்பர் கழக தொழிலாளர்கள், ஊதிய உயர்வு கோரி பல்வேறு கட்ட போராட்டங்களை நடத்திவந்தனர். ரப்பர் கழக அலுவலர்கள் முதல் அமைச்சர்கள் வரை 47 முறை பேச்சுவார்த்தை நடந்தும் பிரச்னை முடிவுக்கு வரவில்லை.

இதைத் தொடர்ந்து, மாவட்டம் முழுவதும் உள்ள ஒன்பது கோட்டங்களிலும் சுமார் 3000 தொழிலாளர்கள் காலவரையற்ற வேலை நிறுத்தப் போராட்டத்தை தொடங்கினர். இந்நிலையில், தொழிற்சங்க நிர்வாகிகளுக்கும் உயர்மட்ட அலுவலர்களுக்கும், நாகர்கோவில் கோட்டத்திலுள்ள தொழில் பேட்டை அலுவலகத்தில் நேற்று (பிப். 18) பேச்சுவார்த்தை நடைபெறுவதாக இருந்தது.

ஆனால், இந்தப் பேச்சுவார்த்தைக்கு ஒருங்கிணைந்த தொழிலாளர் நலத்துறை அலுவலர் வரவில்லை. தொழிற்சங்க நிர்வாகிகள், அலுவலகத்தில் உள்ளிருப்பு போராட்டத்தில் ஈடுபட்டனர்.

இதையும் படிங்க:"சேலம் மாவட்டத்தை பிரிக்க வேண்டும்" - ஜி.கே.மணி