மத பரப்புரையை கண்டித்து இந்து அமைப்பினர் போராட்டம்!

கன்னியாகுமரி: சுற்றுலாப் பயணிகள், பக்தர்கள் ஆகியோரிடம் மதப் பிரச்சார நோட்டீஸ் விநியோகம் செய்யும் நபர்கள் மீது வழக்குப்பதிவு செய்யக்கோரி அனுமதியின்றி ஆர்ப்பாட்டம் செய்ய முயன்ற இந்து அமைப்பினர் கைது செய்யப்பட்டனர்.

கன்னியாகுமரி சர்வதேச சுற்றுலாத் தலமாகவும், இங்குப் பிரசித்தி பெற்ற பகவதி அம்மன் கோவிலும் உள்ளது. கன்னியாகுமரி பகவதி அம்மன் கோவிலுக்கு வரும் பக்தர்களுக்கும், சுற்றுலாப் பயணிகளுக்கும் மத பரப்புரை நோட்டீஸ் விநியோகம் செய்தவர்கள் மீது வழக்குப் பதிவு செய்ய வேண்டும் என்று கன்னியாகுமரி காவல்துறையில் புகார் செய்யப்பட்டது. ஆனால் வழக்குப் பதிய போதிய முகாந்திரம் இல்லை என்று காவல்துறையினர் வழக்குப்பதிவு செய்யவில்லை.

சம்பந்தப்பட்டவர்கள் மீது வழக்குப் பதிவு செய்யக் கோரி கன்னியாகுமரி ரவுண்டானா அருகில் இந்து அமைப்பினர் திடீரென அனுமதி இந்த ஆர்ப்பாட்டத்தில் ஈடுபடப்போவதாக காவல்துறையினரிடம் அனுமதி கேட்டு இருந்தனர். இன்று காலை ஆர்ப்பாட்டம் நடத்த அந்த பகுதியில் அனுமதி மறுக்கப்பட்டது. இதனையடுத்து கன்னியாகுமரி ரவுண்டானா சந்திப்பில் டிஎஸ்பி பாஸ்கரன் தலைமையில் பலத்த காவல்துறை பாதுகாப்பு போடப்பட்டு இருந்தது.

இந்நிலையில், தடையை மீறி இந்து அமைப்பினர் பகவதி அம்மன் கோவில் வளாகத்திலிருந்து ஊர்வலமாக மத பிரச்சாரம் செய்பவர்கள் மீது வழக்குப்பதிவு செய்ய வலியுறுத்தியும், நடவடிக்கை எடுக்காத கன்னியாகுமரி காவல்துறையை கண்டித்து கோஷங்களை எழுப்பிய வண்ணம் பாஜக மாவட்டச் செயலாளர் விசு தலைமையில் போராட்டத்தில் ஈடுபட வந்தனர்.

போராட்டத்தில் ஈடுபட்டவர்களைக் கன்னியாகுமரி காவல்துறை தடுத்து நிறுத்தி 100ம் மேற்பட்டோரை காவல்துறையினர் கைது செய்தனர். இதனால் அங்குப் பரபரப்பு ஏற்பட்டது.