தாய், மகளைக் கொன்று நகைகள் கொள்ளை..!

கன்னியாகுமரி மாவட்டம், முட்டம் பகுதியில் நகைகளை கொள்ளையடித்து விட்டு தாய் மகள் அடித்துக் கொலை செய்யப்பட்ட சம்பவம் அப்பகுதில் பெரும் பரபரப்பினை ஏற்படுத்தியுள்ளது.

கன்னியாகுமரி: வெள்ளிசந்தை அருகே முட்டம் மீனவ கிராமத்தினைச் சார்ந்தவர் அன்றோ சகாயராஜ். இவரருக்கு மனைவி பவுலின் மேரி வயது (48) மற்றும் இரு மகன்கள் உள்ளனர். அன்றோ சகாயராஜ் வெளிநாட்டில் வேலை பார்த்து வருகிறார்.

ஒரு மகன் வெளிநாட்டில் தந்தை உடனும்; மற்றொரு மகன் சென்னையிலும் படித்து வருகிறார். பவுலின் மேரி அவரது தாய் தெரசம்மாளுடன் வசித்து வந்தார். நேற்று(ஜூன்06) அவர்களது உறவினர் பவுலின் மேரியின் செல்போன் எண்ணிற்கு அழைத்தபோது பதில் இல்லை. பல முறை முயற்சி செய்தும் செல்போனில் தொடர்பு கொள்ளமுடியாத நிலை ஏற்பட்டது.

இன்று(ஜூன்07) நேரடியாக வீட்டிற்கு சென்று பார்த்தபோது, அங்கு மின்சார இணைப்புப்பெட்டி உடைக்கப்பட்டு இருந்ததைக் கண்டு முன்பக்க கதவினை உடைத்துச்சென்று உறவினர்கள் பார்த்தபோது பவுலின் மேரி மற்றும் அவரது தாய் தலையில் பலத்த காயத்துடன் ரத்த வெள்ளத்தில் பிணமாக கிடந்தனர். இதைக் கண்டு அதிர்ச்சியடைந்த அவர்கள் போலீசாருக்குத் தகவல் கொடுத்தனர்.

தகவலின் பேரில் அங்கு வந்த போலீசார் சோதனை செய்த போது தாய் மகள் இருவரது தலையிலும் அடித்துக்கொலை செய்யப்பட்டு இருப்பது தெரியவந்தது. மேலும் கழுத்தில் அணிந்து இருந்த தாலி செயின் மற்றும் அணிந்திருந்த நகைகளும் மாயமாகி இருந்தன. கொலை நகைக்காக நடந்ததா அல்லது வழக்கினை திசை திருப்ப நகை கொள்ளையடிக்கப்பட்டதா என்ற சந்தேகம் ஏற்பட்டுள்ளது.

சம்பவம் நடந்த இடத்திற்கு உடனடியாக வந்த மாவட்ட காவல்துறை கண்காணிப்பாளர் கொலை குறித்து விசாரணை மேற்கொண்டார். கை ரேகை நிபுணர்கள் வரவழைக்கபட்டதுடன் மோப்ப நாய் உதவியுடன் குற்றவாளியைத் தேடி வருகின்றனர். இவர்கள் இருவரும் நேற்று(ஜூன்06) கொலை செய்யப்பட்டு இருக்கலாம் எனவும் கூறப்படுகிறது. தாய் மற்றும் மகள் கொலை செய்யப்பட்ட சம்பவம் அப்பகுதில் பெரும் பரபரப்பினை ஏற்படுத்தியுள்ளது.

இதையும் படிங்க:மூதாட்டியைக்கொலை செய்து செயின், தோடு, மூக்குத்தி கொள்ளை..!