'தரமற்ற அரிசியை விரைவில் சரிசெய்வோம்': தமிழ்நாடு தகவல் தொழில்நுட்பத்துறை

கன்னியாகுமரியில் 'நியாய விலைக்கடைகளில் வழங்கப்படும் ரேஷன் அரிசி தரமற்றதாக இருப்பதையடுத்து, விரைவில் அதை சரிசெய்வோம்' என நாகர்கோவிலில் தமிழ்நாடு தகவல் தொழில்நுட்பத்துறை அமைச்சர் மனோ தங்கராஜ் தெரிவித்துள்ளார்.

கன்னியாகுமரி மாவட்டத்தில் பல்வேறு பகுதிகளிலுள்ள நியாய விலைக் கடைகளில் வழங்கப்படும் அரிசி தரமானதாக இல்லை என்று புகார்கள் வந்த நிலையில், கன்னியாகுமரி மாவட்ட நியாய விலைக்கடைகளுக்கு அரிசி சப்ளை செய்யும் கோணம் அரசு நுகர்பொருள் வாணிப கழக கிட்டங்கியில் தமிழ்நாடு தகவல் தொழில்நுட்பத்துறை அமைச்சர் மனோ தங்கராஜ் மற்றும் மாவட்ட ஆட்சியர் அரவிந்த் ஆகியோர் நேற்று (ஜூன் 28) ஆய்வு மேற்கொண்டனர்.

குறைகள் நிவர்த்தி

அப்போது சேமிப்புக் கிட்டங்கியில் அமைச்சர், மாவட்ட ஆட்சியர் ஆகியோர் அரிசி மற்றும் உணவுப் பொருள்களை பார்வையிட்டு அதன் தரத்தை ஆய்வு செய்தனர். இதையடுத்து மாவட்டம் முழுவதும் தரமான உணவுப் பொருள்களை நியாய விலைக்கடைகளில் விநியோகிக்க வேண்டும் என்றும், கிட்டங்கியில் பூச்சிகள் வராதவண்ணம் தூய்மையாக வைத்திருக்க வேண்டும் என்றும் அலுவலர்களிடம் அறிவுறுத்தினர்.

தொடர்ந்து அமைச்சர் மனோ தங்கராஜ் கூறியதாவது, "குமரியில் வழங்கப்படும் ரேஷன் அரிசியில் குறைபாடு இருப்பது உண்மைதான். முந்தைய அரசு கொள்முதல்செய்த தரமற்ற அரிசி என்பதால், அதில் உள்ள குறைகளை நிவர்த்தி செய்வதற்கான முயற்சியில் ஈடுபட்டுக்கொண்டிருக்கிறோம்.

நாங்கள் முடிந்த அளவுக்கு நல்ல அரிசியைத்தான் வழங்கிக்கொண்டிருக்கிறோம். இப்போது துறை சார்ந்த அமைச்சரோடு பேசி, ஏற்கெனவே அனுமதிக்கப்பட்ட கறுப்பு தன்மை அரிசி அதிகமாக இருக்கிறது. அதை மாற்றி கொடுப்பதற்கான முயற்சியில் ஈடுபட்டிருக்கிறோம். விரைவில் அதை சரிசெய்வோம்" என்று கூறினார்.

இதையும் படிங்க: 'சட்டவிரோத குவாரிகளைக் கட்டுப்படுத்த திடீர் சோதனைக் குழுக்கள் - அரசுக்கு யோசனை'