குருத்தோலை ஞாயிறு:வெறிச்சோடி காணப்பட்ட தேவாலயங்கள்

கன்னியாகுமரி: ஊரடங்கு உத்தரவு அமலில் இருப்பதால் தேவாலயங்களில் பாதிரியார்கள் மட்டுமே ஜெபத்தில் ஈடுபட்டனர்.

கிறிஸ்தவர்களின் 40நாள் தவக்காலத்தில் முக்கிய நிகழ்வுகளில் ஒன்றாக கருதப்படுவது குருத்தோலை ஞாயிறு. ஈஸ்டருக்கு முந்தைய ஞாயிற்றுக்கிழமை நடைபெறும் இக்கொண்டாட்டத்தில், குருத்தோலை பிடித்தபடி கிறிஸ்தவர்கள் பாடல்கள் பாடிக்கொண்டு ஜெபித்தவாறே ஊர்வலமாக செல்வார்கள். பின்னர் ஆலயங்களில் சிறப்பு வழிபாடுகள் நடைபெறும்.

அந்தவகையில் இந்த வருடத்திற்கான குருத்தோலை ஞாயிறு நேற்று கொண்டாடப்பட்டது. இந்நிலையில் ஊரடங்கு உத்தரவு பிறப்பிக்கப்பட்டுள்ளதால், பொதுமக்கள் அதிகம் கூட தடை விதிக்கப்பட்டுள்ளது. இதையடுத்து குமரி மாவட்டத்தில் தடை உத்தரவு பிறப்பிக்கப்பட்டுள்ளதால், கிறிஸ்தவ தேவாலயங்களில் பொதுமக்கள் யாரும் வரவில்லை. ஆலயத்திலுள்ள குருமார்கள் மட்டுமே ஜெபத்தில் ஈடுபட்டனர்.

அதேபோல் அப்பகுதியில் உள்ள கிறிஸ்து அரசர் தேவாலயத்தில், பாதிரியார் அருள் ஆனந்த் குருத்தோலை தினத்தை முன்னிட்டு ஆலயத்தில் ஜெபத்தில் ஈடுபட்டார். இதுகுறித்து அவர் கூறுகையில், ”உலகையே அச்சுறுத்திக் கொண்டிருக்கும் கரோனா வைரஸை அழிக்க சிறப்பு ஜெபத்தில் மக்கள் ஈடுபட்டுள்ளனர். உலக நன்மைக்காகவும் நாட்டு மக்களுக்காகவும் மக்கள் ஜெபிக்க வேண்டும். அரசின் உத்தரவுப்படி மக்கள் தனித்தனியாக, தங்களது வீடுகளில் இந்த விழாவை கொண்டாடி வருகின்றனர்” என்று கூறியுள்ளார்.

இதையும் படிங்க:கரோனா பணிகளை மேற்கொள்ள தன்னார்வலர்கள் முன்வரவேண்டும்