மார்த்தாண்டத்தில் ஆக்கிரமிப்புகள் அகற்றம் - வர்த்தகர்கள் எதிர்ப்பு!

கன்னியாகுமரி: மார்த்தாண்டம் பகுதியில் போக்குவரத்து நெரிசல் ஏற்படுவதால் அங்குள்ள ஆக்கிரமிப்புகளை, வர்த்தகர்களின் கடும் எதிர்ப்பையும் மீறி நகராட்சி அதிகாரிகள் அகற்றினர்.

குமரி மாவட்டம் மார்த்தாண்டம் அருகே குலசேகரம் சந்திப்பு பகுதியில் வணிக நிறுவனங்கள், மருத்துவக் கல்லூரிகள், அரசு மற்றும் தனியார் பள்ளிகள் அதிகளவில் இருப்பதால், மார்த்தாண்டம் - பேச்சிப்பாறை சாலையில் நாள்தோறும் போக்குவரத்து நெரிசல் ஏற்படுவதால், பொதுமக்கள் பாதிக்கப்படுகின்றனர்.

இதற்கு, கல்லடி மாமூடு முதல் குலசேகரம் கான்வென்ட் சந்திப்பு வரையில், சாலையின் இரு புறங்களிலும் வர்த்தகர்கள் ஆக்கிரமித்திருப்பதே காரணமெனவும் இதனால் போக்குவரத்து நெரிசலும், விபத்துக்களும் ஏற்படுவதாகக்கூறிய பொதுமக்கள், இதற்கு நடவடிக்கை எடுக்கக்கோரி பேரூராட்சி நிர்வாகத்திடம் கோரிக்கை மனு அளித்தனர்.

இதையடுத்து, ஆக்கிரமிப்புகளை அகற்ற சென்ற பேரூராட்சி அதிகாரிகளிடம், வர்த்தகர்கள் எதிர்ப்பு தெரிவித்து வாக்குவாதத்தில் ஈடுபட்டனர். இதனால் குலசேகரம் பகுதியில் சிறிதுநேரம் பரபரப்பு ஏற்பட்டது. அதன்பின், வர்த்தகர்களின் எதிர்ப்பையும் மீறி அதிகாரிகள் ஆக்கிரமிப்புகளை அகற்றினர். நகராட்சி நிர்வாகத்தின் இந்த நடவடிக்கையால் அப்பகுதி மக்கள் மகிழ்ச்சியடைந்துள்ளனர்.