தேர்தல் ஆணையம் ஒரு நாடக கம்பெனி - சீமான்

தேர்தல் ஆணையம் என்பது நாடக கம்பெனி, பறக்கும் படை அமைப்பார்கள் அப்பாவி மக்களிடம் பணம் பறிப்பார்கள், ஆகவே தேர்தல் ஆணையத்தையே சீர்திருத்த வேண்டும் என சீமான் தெரிவித்தார்.

தமிழ்நாட்டில் விடுபட்ட ஒன்பது மாவட்டங்களில் ஊரக உள்ளாட்சித் தேர்தல் அக்டோபர் 6, 9 ஆகிய தேதிகளில் நடைபெறுகிறது. இந்நிலையில் நாம் தமிழர் கட்சி ஒருங்கிணைப்பாளர் சீமான் காஞ்சிபுரம் மாவட்டத்தில் பரப்புரையில் ஈடுபட்டார்.

காஞ்சிபுரம் மேட்டுத் தெருவிலுள்ள திருமண மண்டபம் நாம் தமிழர் கட்சியின் வேட்பாளர்களுடனான கலந்தாய்வுக் கூட்டத்தில் பங்கேற்றார். பின்னர் செய்தியாளரைச் சந்தித்த சீமான் பேசுகையில், “தேர்தல் ஆணையம் என்பது நாடக கம்பெனி, பறக்கும் படை அமைப்பார்கள் அப்பாவி மக்களிடம் பணம் பறிப்பார்கள்.

ஆகவே தேர்தல் ஆணையத்தையே சீர்திருத்த வேண்டும். தற்போது அரசியல் என்பது சாதி, மதம், சாராயம், கவர்ச்சி, பணம் ஆகிய ஐந்து தூண்களால் கட்டமைக்கப்படுகிறது.

பரப்புரையில் சீமான்

சாதி, மதம், சாராயம் தாண்டினாலும் பணத்தைத் தாண்ட முடியவில்லை. ஒன்பது மாவட்டத் தேர்தலில் மூக்குத்தி, அண்டா, குண்டா, பட்டுச் சேலைகளை மொத்தமாக அள்ளிச் சென்று உள்ளார்கள். எம்பி, எம்எல்ஏக்கள் அதைவிட அதிக வருமானம் ஈட்டும் தொழிலாக உள்ளாட்சிப் பதவி உள்ளது.

ஒரேநாளில் தேர்தலை நடத்த முடியுமா?

குறுநில மன்னர்கள்போல உள்ளாட்சிப் பதவியில் உள்ளவர்கள் செயல்படுவார்கள், குறைந்த ஜனநாயகம் அதிகபட்சம் பணநாயகம் ஆக மாறியுள்ளது. இது ஒரு அங்கீகரிக்கப்பட்ட செயலாக மாறியுள்ளது.

வேளாண் பயிர்க்கடன் தள்ளுபடி, நகைக்கடன் தள்ளுபடி எனக் கூறும் இவர்களை நாம் தள்ளுபடி செய்ய வேண்டும். எதற்கெடுத்தாலும் அமெரிக்காவை எடுத்துக்காட்டாகக் கூறும் நீங்கள் ஒரேநாளில் தேர்தலை நடத்த முடியுமா?

மேலும் ஒரே நாடு, ஒரே குடும்ப அட்டை, ஒரே ஜிஎஸ்டி எனக் கூறும் நீங்கள் உள்ளாட்சித் தேர்தலைக்கூட ஒரே நாளில் நடத்த முடியவில்லை” என்றார்.

இந்நிகழ்வில் மாநில ஒருங்கிணைப்பாளர்கள் ஜெகதீஷ் பாண்டியன், அன்பு தென்னரசு, கதிர் ராஜேந்திரன், மாவட்டச் செயலாளர் சால்டின் சாமுவேல், மாவட்டத் தலைவர் பிரகதீஸ்வரன், மாவட்டப் பொருளாளர் குமரேசன் உள்ளிட்ட தேர்தல் பொறுப்பாளர்கள் கலந்துகொண்டனர்.

இதையும் படிங்க:உள்ளாட்சித் தேர்தல்- மநீம கமல் பரப்புரை தேதி அறிவிப்பு!