மதுபானக் கடையை மூடக்கோரி மருத்துவர்கள், செவிலியர்கள் ஆர்ப்பாட்டம்!

காஞ்சிபுரம் : மதுபானக் கடையை மூடக்கோரி காஞ்சிபுர அரசு மருத்துவமனையில் மருத்துவர்கள், செவிலியர்கள் ஆர்ப்பாட்டத்தில் ஈடுபட்டனர்.

காஞ்சிபுரம் மாவட்டம் செங்கல்பட்டு அரசு பொது மருத்துவமனைக்கு சிகிச்சைக்காக தன் மனைவியுடன் அளவுக்கு அதிகமான மதுபோதையில் வந்த வினோத் என்ற நோயாளி தனக்கு முதலில் சிகிச்சை அளிக்குமாறு மருத்துவர்களை தகாத வார்த்தைகளால் ஒருமையில் பேசி உள்ளார். மருத்துவர்கள் உடனடியாக மருத்துவமனை இரவுநேர காவலரிடம் புகார் தெரிவித்துள்ளனர்.

இதனையடுத்து காவலர், குடிபோதையில் வந்த நோயாளியை தட்டிக் கேட்டபோது அவரையும் சரமாரியாக தாக்கிவிட்டு அந்த இடத்தை விட்டு அவர் வெளியேறினார். பிறகு சிறிதுநேரம் கழித்து மீண்டும் அந்த நோயாளி சிகிச்சை அளிக்குமாறு மருத்துவர்களிடம் மீண்டும் வாக்குவாதத்தில் ஈடுபட்டு பணியில் இருந்த செவிலியர்களையும், மருத்துவர்களையும் தகாத வார்த்தைகளால் திட்டியுள்ளார்.

இதனால் கோபமடைந்த மருத்துவர்கள், செவிலியர்கள் 100க்கும் மேற்பட்டோர் போதையில் வந்த நோயாளியை உடனடியாக கைது செய்யக்கோரி கோஷங்கள் எழுப்பியவாறு மருத்துவமனை வளாகத்தில் அமர்ந்து நள்ளிரவு முதல் ஆர்ப்பாட்டத்தில் ஈடுபட்டனர்.

மேலும், மருத்துவமனை எதிரே உள்ள மதுபானக் கடையை மூடவேண்டும், மருத்துவமனையில் மருத்துவர்களுக்கு ஆயுதம் தாங்கிய போலீஸ் பாதுகாப்பு அளிக்க வேண்டும் எனற கோரிக்கையை முன்வைத்து போராடி வருகின்றனர்.