ஊழல் இல்லா ஒரே ஆட்சி அதிமுக ஆட்சிதான் - எடப்பாடி பழனிசாமி

காஞ்சிபுரம்: ஊழல் இல்லா ஒரே ஆட்சி அதிமுக ஆட்சிதான் என முதலமைச்சர் எடப்பாடி பழனிசாமி பெருமிதம் தெரிவித்துள்ளார்.

காஞ்சிபுரம் மாவட்டம், திருக்கழுக்குன்றத்தில் இன்று அதிமுக கூட்டணி கட்சி வேட்பாளர்களை ஆதரித்து தமிழக முதலமைச்சர் எடப்பாடி பழனிசாமி பரப்புரை மேற்கொண்டார். அப்போது அவர் பேசியதாவது, திமுக தலைவராக இருக்கும் ஸ்டாலின் முதலில் செயல் தலைவராக இருந்தார். பிறகு கட்சித் தலைவராக ஆனார்.

கழகத் தலைமை பொறுப்பை ஏற்றுக்கொண்டதும், தற்போது முதலமைச்சர் பதவிக்கு வர ஆசைப்படுகிறார். அதுமட்டுமில்லாமல் தற்போது கூலிப்படைக்கு தலைவராக மாறி இருக்கிறார். இதைவிட ஒரு அவப்பெயர் அக்கட்சிக்கு தேவை இல்லை. அப்படிப்பட்ட ஆட்சி தான் உங்களுக்கு வேண்டுமென்றால் உங்களை யாராலும் காப்பாற்ற முடியாது.

மேலும் மோடியால் மட்டும் தான் தமிழகத்திற்கு ஒரு நல்ல பாதையை கொண்டுவர முடியும். எனவே அவரை மீண்டும் பிரதமராக வேண்டும் என்றும், அதற்கு இரட்டை இலை சின்னத்தில் வாக்களித்து ஆதரிப்பீர்கள் என்று கேட்டுக்கொண்டார்.