பவானி அணையில் பாசனத்திற்குத் திறக்கப்பட்ட நீர் நிறுத்தம்!

ஈரோடு: பரவலாக மழை பெய்ததால் பவானி அணையிலிருந்து திறக்கப்படும் நீர் நிறுத்தம் செய்யப்பட்டுள்ளது. இதனால் 8 மெகாவாட் நீர்மின் உற்பத்தியும் நிறுத்தம் செய்யப்பட்டுள்ளது.

ஈரோடு மாவட்டத்தின் முக்கிய நீர் ஆதாரமாக விளங்கும் பவானி அணையின் மூலம் ஈரோடு, திருப்பூர் மற்றும் கரூர் மாவட்டங்களில் உள்ள 2 இலட்சத்து 47 ஆயிரம் ஏக்கர் நிலங்கள் பாசன வசதி பெறுகின்றன.

கடந்த ஆகஸ்ட் மாதத்தின் தொடக்கத்தில் நீர்ப்பிடிப்பு பகுதிகளில் பெய்த கனமழையால், அணையின் நீர்மட்டம் 94 அடியை எட்டியதால் தடப்பள்ளி, அரக்கன்கோட்டை, காளிங்கராயன் வாய்க்கால் பாசனத்திற்கும், கீழ்பவானி பிரதான வாய்க்கால் பாசனத்திற்கும் தண்ணீர் திறக்கப்பட்டது.

இந்நிலையில் கடந்த 2 நாட்களாக ஈரோடு மாவட்டத்தில் பரவலாக மழை பெய்து வருகிறது. இதன்காரணமாக பவானி ஆற்றில் பாசனத்திற்கு திறக்கப்பட்ட 600 கன அடி நீர் நேற்று முதல் நிறுத்தப்பட்டுள்ளது. இதேபோல் கீழ்பவானி வாய்க்காலில் விநாடிக்கு 2 ஆயிரத்து 300 கன அடி வீதம் திறக்கப்பட்ட தண்ணீர் 200 கன அடி குறைக்கப்பட்டு 2 ஆயிரத்து 100 கன அடி நீர் வெளியேற்றப்படுகிறது.

நேற்று காலை நிலவரப்படி அணையின் நீர்மட்டம் 95.70 அடியாகவும், நீர் இருப்பு 25.4 டிஎம்சியாகவும் உள்ளது. அணைக்கு நீர்வரத்து விநாடிக்கு 3 ஆயிரத்து 466 கன அடியாக உள்ளது. பவானி ஆற்றில் நீர் நிறுத்தப்பட்டதால் 8 மெகாவாட் மின் உற்பத்தி நிறுத்தப்பட்டுள்ளது.

பாசனப்பகுதிகளில் பரவலாக மழை பெய்ததால் பாசனத்திற்குத் திறக்கப்பட்ட தண்ணீர் நிறுத்தப்பட்டுள்ளதாகவும் மழை குறையும் பட்சத்தில் வழக்கம் போல் பாசனத்திற்கு தண்ணீர் திறக்கப்படும் எனவும் பொதுப்பணித்துறை அதிகாரிகள் தெரிவித்துள்ளனர்.

இதையும் படிக்க: தமிழ்நாட்டில் சில இடங்களில் பரவலாக மழை- வானிலை ஆய்வு மையம்