12 ஆண்டுகளுக்கு பின் நிறைந்த நல்லூர் குளத்தால் கிராம மக்கள் கொண்டாட்டம்
ஈரோடு: சத்தியமங்கலம் அடுத்த நல்லூர் ஊராட்சியில் 10க்கும் மேற்பட்ட குக்கிராமங்கள் உள்ளன. வறட்சியான இப்பகுதியில் போதிய நிலத்தடிநீர் இல்லாததால், மானாவாரி பயிரான நிலக்கடலை, சோளம் பயிரிடுவது வழக்கம். விவசாயம் மற்றும் கால்நடை வளர்ப்பு முக்கிய தொழிலாகக் கொண்ட இக்கிராமத்தில், 60 ஏக்கர் நிலப்பரப்பில் நல்லூர் குளம் உள்ளது.
அண்மையில் பெய்த மழையால் பல்வேறு ஓடைகளில் இருந்து வந்த நீர், நல்லூர் குளத்துக்கு வந்து சேர்ந்ததால் நல்லூர் குளம் நிரம்பி, உபரிநீர் வெளியேறியது. இதனால் 800 அடி ஆழத்தில் இருந்த நிலத்தடிநீர் மட்டம், தற்போது 100 அடியில் கிடைக்கிறது. விவசாயக் கிணறுகளில் நிலத்தடி நீர் மட்டம் உயர்ந்ததால், விவசாயிகள் மானாவாரி பயிரிலிருந்து மாறி வாழை சாகுபடி செய்ய துவங்கிவிட்டனர்.