எடப்பாடி பழனிசாமி தான் முதலமைச்சர், அதில் எந்த மாற்றமும் இல்லை - அமைச்சர் கே.சி.கருப்பணன்!

ஈரோடு: வருகின்ற சட்டப்பேரவைத் தேர்தலில் எடப்பாடி பழனிசாமி தான் முதலமைச்சர் என்பதில் எந்த மாற்றமும் இல்லை என சுற்றுச்சூழல்துறை அமைச்சர் கே.சி.கருப்பணன் தெரிவித்துள்ளார்.

ஈரோடு மாவட்டம் கோபிசெட்டிபாளையம் அருகே உள்ள கவுந்தப்பாடி மத்திய கூட்டுறவு வங்கியின் சார்பில் 375 நெசவாளர்களுக்கு ரூ.18.75 மதிப்பிலான மானியத்தொகையை நெசவாளர் கூட்டுறவு சங்கத்தில் சுற்றுச்சூழல்துறை அமைச்சர் கே.சி.கருப்பணன் வழங்கினார்.

அப்போது அவர் பேசுகையில், “தமிழ்நாடு அரசு குடும்ப தேவைக்காகன 50 விழுக்காடு தேவைகளை நிறைவேற்றி, தேவையான அடிப்படை வசதிகளை மேம்படுத்தியுள்ளது.

சாப்பாட்டிற்கு பஞ்சமில்லாத அரசாக செயல்படுகிறது. விவசாய விளைபொருள்களுக்கும் உரிய விலை கிடைத்துவருகிறது. விலைவாசியும் கட்டுக்குள் உள்ளது. முதலமைச்சரின் கவனத்திற்கு சென்றால் எந்த பிரச்னையாக இருந்தாலும் உடனடியாக தீர்வு மேற்கொள்ளப்பட்டு வருகிறது.

விவசாயிகளுக்கு ஒவ்வொரு ஆண்டும் வட்டில்லா பயிர் கடன்கள் அதிகளவு வழங்கப்பட்டுவருகிறது. இன்னும் ஆறு மாதங்களில் தேர்தல் வரவுள்ளதால் நல்ல திட்டங்களை மனதில் கொண்டு ஒவ்வொரு குடும்பத்தில் உள்ள அனைவரும் அதிமுவிற்கு வாக்களிக்கவேண்டும். நாட்டிற்கு தேவையான பசுமை வழி நான்கு வழிச்சாலை திட்டத்தை செயல்படுத்த எதிர்க்கட்சிகள் எதிர்ப்பு தெரிவிப்பதுடன் மக்களை தூண்டிவிடுவதால் தான் பிரச்சனை ஏற்படுகிறது.

வரும் சட்டப்பேர்வை தேர்தலில் எடப்பாடி பழனிச்சாமி தான் முதலமைச்சர், அதில் எந்த மாற்றமும் இல்லை என தெரிவித்துள்ளார்.

அதனை தொடர்ந்து கவுண்டன்புதூரில் ரூ.8.66 மதிப்பில் புதியதாக கட்டப்பட்ட அங்கன்வாடி மையக்கட்டடத்தை ரிப்பன் வெட்டி திறந்து வைத்த பின்னர் கரட்டுப்பாளையம், வைரமங்கலத்தில் தலா ரூ.5 லட்சம் மதிப்பீட்டில் புதிதாக கட்டப்பட்டுள்ள பயணிகள் நிழற்குடைகளையும் திறந்து வைத்து பொதுமக்களுக்கு இனிப்புகள் வழங்கினார்.

இந்நிகழ்வுகளில் கோட்டாட்சியர் ஜெயராமன் கூட்டுறவு சங்க பதிவாளர் அரசு அலுவலர்கள், உள்ளாட்சி பிரதிநிதிகள் உள்பட பலர் கலந்து கொண்டனர்.