செயல்படாத கல்குவாரியில் சிறுத்தை நடமாட்டம்: கூண்டுவைத்துப் பிடிக்க முயற்சி

ஈரோடு: தாளவாடி நகர்ப்பகுதியில் உள்ள செயல்படாத கல்குவாரியில் சிறுத்தை நடமாட்டம் இருப்பதையடுத்து, அதனைப் பிடிக்க வனத் துறையினர் கூண்டுவைத்து கண்காணித்துவருகின்றனர்.

ஈரோடு மாவட்டம் தாளவாடி மலைப்பகுதியில் 50-க்கும் மேற்பட்ட மலை கிராமங்கள் உள்ளன. வனப்பகுதியை ஒட்டியுள்ள இந்த மலை கிராமங்களில், இரவு நேரத்தில் சிறுத்தை உள்ளிட்ட வன விலங்குகள் புகுந்து உழவர்கள் வளர்க்கும் ஆடு, மாடு உள்ளிட்ட கால்நடைகளை அடித்துக்கொல்வது தொடர்கதையாக உள்ளது.

மேலும் தாளவாடி நகர்ப்பகுதியை ஒட்டியுள்ள நேதாஜி நகர், ஒசூர், தொட்டகாஜனூர், மெட்டல்வாடி, சூசையபுரம், பீமராஜ் நகர் உள்ளிட்ட பகுதிகளில் உள்ள செயல்படாத கல்குவாரி பகுதிகளில் சிறுத்தைகள் பகல் நேரத்தில் பதுங்கிக் கொண்டு, இரவு நேரத்தில் குவாரியை விட்டு வெளியேறி வேளாண் தோட்டங்களில் நடமாடுகின்றன.

இந்நிலையில் நேதாஜி நகரை ஒட்டி அமைந்துள்ள கல்குவாரி கடந்த 10 ஆண்டுகளாகச் செயல்படாமல் உள்ளன. இந்தச் செயல்படாத கல்குவாரியில் சிறுத்தைகள் நடமாட்டம் உள்ளதாகக் கூறப்படுகிறது. சிறுத்தை நடமாட்டத்தை இப்பகுதி மக்கள் நேரில் பார்த்துள்ளனர்.

கடந்த சில நாள்களுக்கு முன்பு இப்பகுதியில் உள்ள உழவர் கந்தசாமி என்பவரது தோட்டத்தில் நுழைந்த சிறுத்தை பசுமாட்டை அடித்துக் கொன்றது. இதனால் தாளவாடி நகர்ப்பகுதி பொதுமக்கள் மிகுந்த அச்சமடைந்துள்ளனர்.

நகர்ப்பகுதியை ஒட்டி சிறுத்தை நடமாடுவதால் அப்பகுதி மக்கள் அளித்த புகாரின்பேரில் கல்குவாரி பகுதியில் தாளவாடி வனத் துறையினர் சிறுத்தையைப் பிடிப்பதற்காக கூண்டுவைத்தனர். ஆனால் சிறுத்தை கூண்டில் சிக்காமல் போக்கு காட்டிவருகிறது.

செயல்படாத கல்குவாரிகள் உள்ளதால் இப்பகுதியில் சிறுத்தைகள் தங்கிவிடுவதாகவும், செயல்படாத கல்குவாரிகளைச் சுத்தம்செய்து சிறுத்தைகள் தங்காத வண்ணம் பாதுகாப்பு நடவடிக்கை மேற்கொள்ள மாவட்ட நிர்வாகம் நடவடிக்கை எடுக்க வேண்டும் என அப்பகுதி பொதுமக்கள் கோரிக்கைவிடுத்துள்ளனர்.

இதையும் படிங்க: வெந்த புண்ணில் வேலைப்பாய்ச்சும் நெல் கொள்முதல் நிலைய கட்டணம்!