சரக்கால் வந்த தகராறு: பெயிண்டரை கொலைசெய்த நண்பன்!

ஈரோடு: மது போதையில் நண்பர்களிடையே ஏற்பட்ட தகராறில், ஒருவர் வெட்டிப் படுகொலை செய்யப்பட்டார், சிசிடிவி காட்சிகள் மூலம் கொலையாளியை காவல்துறையினர் கைது செய்துள்ளனர்.

ஈரோடு மாவட்டம், நாடார் மேடு பகுதியைச் சேர்ந்தவர் மஞ்சுநாதன் (24). பெயிண்ட்டரான இவர், நேற்று தனது பணியை முடித்துவிட்டு அதே பகுதியில் உள்ள மதுக்கடையில் தனது நண்பன் செந்தில் (27) உட்பட நான்கு பேருடன் மது அருந்தியுள்ளார்.

அப்போது, போதையில் இருந்த மஞ்சுநாதனுக்கு செந்திலுக்கும் இடையே வாய் தகராறு ஏற்பட்டு, பின்னர் சண்டையாக மாறி உள்ளது. சண்டை உச்சகட்டத்தை அடைந்தவுடன் ஆத்திரமடைந்த செந்தில் தன்னிடம் இருந்த கத்தியால்மஞ்சுநாதனை சரமாரியாக குத்தியுள்ளார்.

இதில் பலத்த காயம் அடைந்த அவர், ஈரோடு அரசு தலைமை மருத்துவமனையில் சிகிச்சைக்காக சேர்க்கப்பட்டார், பின் சிகிச்சை பலனின்றி உயிரிழந்தார். இது குறித்து வழக்குப்பதிந்த காவல் துறையினர் தீவிரமாக விசாரணை மேற்கொண்டுவந்தனர்.

அப்போது, சம்பவம் நடந்த இடத்தில் உள்ள சிசிடிவி கேமராவில் பதிவான காட்சிகளைக் கொண்டு, செந்தில்தான் கொலை செய்தார் என உறுதிப்படுத்திக் கொண்டு அவர் மீது வழக்குப்பதிந்து கைது செய்தனர்.