கடம்பூரில் அறுவடைக்குத் தயாராக இருந்த ரூ.5 லட்சம் மதிப்பிலான மக்காச்சோளக் கதிர்களை யானைகள் தின்றும், மிதித்தும் நாசப்படுத்துவதாக அப்பகுதி விவசாயிகள் வேதனை
ஈரோடு:சத்தியமங்கலம் அடுத்த கடம்பூர் மலைப்பகுதியில், மானாவாரிப் பயிரான மக்காச்சோளம் அதிகளவில் சாகுபடி செய்யப்படுகிறது. கடந்த மாதம் பெய்த மழையால், 3 மாதப் பயிரான மக்காச்சோளம், தற்போது நன்கு செழித்து வளர்ந்து, கதிர் விட்டு அறுவடைக்குத் தயாராக இருந்தது.
இந்த நிலையில் கடம்பூர், ஏரியூர், செங்காடு ஆகிய பகுதிகளில் சில நாட்களாக காட்டு யானை மக்காச்சோளக் காட்டுக்குள் புகுந்து பயிர்களை சேதப்படுத்தி வருகிறது. இதையடுத்து, இன்று அதிகாலை ஏரியூர் கிராமத்தில் புகுந்த காட்டு யானைகள், அங்குள்ள ரமேஷ், சித்தன், சுப்பிரமணி, ராமசாமி, தங்கராஜ் ஆகியோரது தோட்டத்தில் அறுவடைக்குத் தயாராக இருந்த மக்காச்சோளக் கதிர்களை தின்றும், மிதித்தும் நாசப்படுத்தியதாக கூறப்படுகிறது.