ஈரோடு: தமிழ்நாடு கர்நாடகத்தை இணைக்கும் முக்கிய வழித்தடமாக மைசூர் ஆசனூர் தேசிய நெடுஞ்சாலை உள்ளது. தினந்தோறும் ஆயிரக்கணக்கான சரக்கு வாகனங்கள் பயணிக்கின்றன. ஈரோடு மாவட்ட ஆட்சியரின் உத்தரவுபடி 16.2 டன்னுக்கு குறைவாக பாரம் ஏற்றி வாகனங்கள் மட்டுமே ஆசனூர் காரப்பள்ளம் சோதனைச்சாவடியில் அனுமதிக்கப்படுகின்றன.
இந்நிலையில் கர்நாடகத்தில் இருந்து 16.2 டன்னுக்கு அதிகமாக மக்காச்சோளம் பாரம் ஏற்றி வந்த 10 சக்கர லாரிகளை வனத்துறையினர் காரப்பள்ளம் சோதனைச்சாவடியில் இன்று (டிச. 19) தடுத்து நிறுத்தினர். அனுமதிக்கப்பட்ட அளவை விட கூடுதலாக இருந்ததால் 5 மக்காசோளம் பாரம் ஏற்றி வந்த லாரிகளை திருப்பி அனுப்பினர். இதற்கு ஓட்டுநர்கள் கடும் எதிர்ப்பு தெரிவித்து போராட்டத்தில் ஈடுபட்டனர்.
இதனால் ஒன்றரை மணி நேரம் போக்குவரத்து பாதிக்கப்பட்டது. ஓட்டுநர்கள் போராட்டம் காரணமாக அடர்ந்த வனப்பகுதியில் அரசு பேருந்துகள், கரும்பு லாரிகள் வரிசையாக அணிவகுத்து நின்றன. சாலையோரம் முகாமிட்டிருந்த ஆண் யானை கரும்பை சுவைக்க வந்தது. அப்போது எந்தவித அச்சமும் இன்றி யானையுடன் ஓட்டுநர்கள் செல்பி எடுத்துக்கொண்டனர்.