முன்னாள் ராணுவ வீரர் வீட்டில் 75 சவரன் நகை கொள்ளை!

திண்டுக்கல் அருகே பட்டப்பகலில் முன்னாள் ராணுவ வீரர் வீட்டில் 75 சவரன் தங்க நகை, 50 லட்சம் பணம் கொள்ளையடித்த அடையாள தெரியாத நபர்களை காவல்துறையினர் தேடி வருகின்றனர்.

திண்டுக்கல்: ஒட்டன்சத்திரம் கருவூலக் காலனியில் வசித்து வருபவர் உத்தமராஜா; முன்னாள் ராணுவ வீரர். ராணுவத்திலிருந்து ஓய்வு பெற்ற பிறகு வெளிநாட்டில் தனியார் நிறுவனத்தில் பணிபுரிந்து வருகிறார்.

கடந்த இரண்டு மாதங்களுக்கு முன்பு ஒட்டன்சத்திரத்தில் உள்ள தனது வீட்டிற்கு குடும்பத்துடன் வந்து விட்டார். இவர் ஒட்டன்சத்திரம் அருகே உள்ள தேவத்தூர் பகுதியில் தோட்டம் வாங்க முடிவு செய்தார். அதற்காக நேற்று (மே 10) காலை தனது மனைவியுடன் சென்று தோட்டத்தை பார்த்துவிட்டு மாலை வீடு திரும்பினார்.

அப்போது, வீட்டின் வெளிப்பூட்டு மற்றும் கதவை உடைக்கப்பட்டிருப்பதைக் கண்டு அதிர்ச்சியடைந்தார். வீட்டின் உள்ளே சென்று பார்த்தபோது பீரோ மற்றும் லாக்கர் உடைக்கப்பட்டு 50 லட்சம் ரூபாய் பணம் மற்றும் 75 சவரன் தங்க நகைகள் திருடு போனது தெரிய வந்தது.

உடனடியாக உத்தமராஜா காவல்துறைக்கு தகவல் அளித்தார். இதனைத் தொடர்ந்து காவல் துணை கண்காணிப்பாளர் அசோகன், காவல் ஆய்வாளர் சீனிவாசன் ஆகியோர் சம்பவ இடத்திற்கு மோப்பநாய் மற்றும் கைரேகை நிபுணர்களுடன் வந்து தடையங்களை சேகரித்தனர்.

இந்த கொள்ளைச் சம்பவம் குறித்து வழக்குப்பதிவு செய்த காவல்துறையினர் அடையாள தெரியாத கொள்ளையர்களை தீவிரமாக தேடி வருகின்றனர்.

இதையும் படிங்க: அமெரிக்காவில் 12 முதல் 15 வயதினருக்கும் தடுப்பூசி!