'தென்னிந்திய அளவிளான வாலிபால் போட்டிக்கு அழைத்துச் செல்லவில்லை' - மாணவிகள் வேதனை

திண்டுக்கல்: சென்னையில் நடைபெறவுள்ள தென்னிந்திய அளவிளான வாலிபால் போட்டிக்கு அழைத்துச் செல்லாமல், கொடைக்கானல் அன்னை தெரசா மகளிர் பல்கலைக்கழக நிர்வாகிகள் , அலைக்கழிப்பு செய்வதாக மாணவிகள் குற்றஞ்சாட்டியுள்ளனர்.

திண்டுக்கல் மாவட்டம் கொடைக்கானலில் அட்டுவம்பட்டி பகுதியில் அன்னைதெரசா மகளிர் பல்கலைக்கழகம் இயங்கி வருகிறது. இதன்கீழ் திண்டுக்கல், தேனி உள்ளிட்ட பகுதிகளில் 12 மகளிர் கலைக்கல்லூரிகள் இயங்கி வருகின்றன.

இந்தக் கல்லூரிகளில் இருந்து வாலிபால் போட்டியில் சிறப்பாக விளையாடிய மாணவிகள் பல்கலைக்கழகம் அணியில் இடம்பெறுவர். சென்னையில் நடைபெறவுள்ள தென்னிந்திய அளவிலான வாலிபால் போட்டிக்கு அழைத்துச் செல்லாமல், கொடைக்கானல் அன்னை தெரசா மகளிர் பல்கலைக்கழக நிர்வாகிகள் அலைக்கழிப்பு செய்வதாகப் புகார் எழுந்துள்ளது.

இதுகுறித்து செய்தியாளர்களிடம் பேசிய பழநி கல்லூரி மாணவிகள், ' சென்னையில் தென்னிந்திய அளவில் பல்கலைக் கழகங்களுக்கு இடையேயான வாலிபால் போட்டிகள் நடைபெறுகின்றன. கடந்த ஆண்டு ஆந்திராவில் நடந்த போட்டிகளுக்கு எல்லாம் பல்கலைக்கழக அணியை அழைத்துச் சென்றார்கள்.

இந்த ஆண்டு சென்னையில் நடைபெறும் போட்டிக்கு அழைத்துச் செல்ல மறுக்கின்றனர். மேலும் உடற்கல்வி இயக்குநர் தங்களை போட்டிக்கு அழைத்து செல்வதில் அலட்சியம் காட்டுகிறார்.

நாங்கள் பல்கலைக் கழகத்துக்காக விளையாடினால், எங்களுக்குச் சான்றிதழ் கிடைப்பதன் மூலம் அரசு வேலைவாய்ப்புகளில் முன்னுரிமை பெற முடியும். எனவே, இந்த விஷயத்தில் விளையாட்டுத்துறை தலையிட்டு எங்களை போட்டியில் பங்கு பெற நடவடிக்கை எடுக்க செய்ய வேண்டும்' எனக் கூறினார்.

இதையும் படிங்க: மழைநீரை அகற்றக்கோரி சட்டமன்ற உறுப்பினர் போராட்டம்